首頁 日報娛樂

27年寫不出好劇本 街坊裝許冠文慢活人生攞靈感

03/01/2020
■Michael係銅鑼灣常客,經常街坊裝現身搭小巴。
■Michael係銅鑼灣常客,經常街坊裝現身搭小巴。 (1/7)

  今年77歲的「喜劇泰斗」許冠文(Michael),3年前主演過新戲《一路順風》後,近年都係客串性質拍電影,產量好少。雖然冇乜嘢做,但Michael都唔會hea喺屋企,反而會周圍去感受吓生活,攞吓靈感。日前一個中午Michael獨自現身銅鑼灣白沙道搭14M專線小巴返渣甸山,當日天氣和暖,不過Michael竟然着住件厚羽絨,拉鏈仲拉到上頸,明顯係怕攝親,睇嚟好識得養生。採訪:粱志明

  許冠文對上一次一腳踢,自編自導的作品已經是1992年的《神算》,並找來了黃子華一起編劇,可惜27年寫唔出好劇本,所以寧願啱先做,湊孫為樂,慢活享受人生。日前本報見到Michael一身黑色簡樸街坊裝,揹住個側揹袋,兼拎住個紅色膠袋出現銅鑼灣白沙道搭專線小巴回家,保養得宜的Michael動作靈活,上落小巴輕鬆自在,絕對難唔到呢位老人家。上車後Michael好有條理咁先袋好買完嘢找續嘅錢,隨即喺袋內攞出一包紙巾係咁「包雲吞」,擤到連眼水都流埋,睇落唔多舒服。幸而Michael開工唔多,生活正常又健康,都係嗰句,小病是福囉。

對創作仍然有火

  許冠文向來鍾意喜劇及棟篤笑,之前他接受訪問時提及過,因為大家常常都過得唔快樂,所以需要再向觀眾演繹生活中嘅悲傷,等大家得到共嗚,用美好嘅角度睇呢個世界!不過,創作到一個貼地又鬼馬嘅劇本唔容易,他堅持唔可以因為年老,就拍一些自己都接受唔到嘅作品,萬一觀眾以為他等錢使點算好?但如果有好劇本,又會重燃心中團火。要睇Michael嘅好作品,咁大家要耐心等吓喇!

其他文章
hd