首頁 日報娛樂

圈中花心男主動走近 李靜儀拒為愛改變自己

17/01/2020
■Heidi直言曾為另一半委屈自己,現時覺得只可適當地遷就,要Be Yourself。
■Heidi直言曾為另一半委屈自己,現時覺得只可適當地遷就,要Be Yourself。 (1/6)

  女子組合Super Girls(SG)成員李靜儀(Heidi)前年推出個人品牌「Be True To Yourself(B.T.T.Y.)」,近日又為一系列全新服飾推出首隻個人新歌《Be True》來造勢!獲封「冰山美人」的Heidi堅決做自己,惜Cool爆性格令異性難以埋身,雖然她明言恨拍拖,但也不會輕易墮入愛河,更加不會揀藝人做男友,事關她遇過「不忠男」,覺得圈中太多誘惑,毫無安全感!撰文:黎寶倫 攝影:李維隆

  今次服裝印上「Be Yourself」、「Do not bother me 」等Slogan,反映了李靜儀反叛一面,她自言最反叛是唔聽媽咪話入娛樂圈,「媽咪好保守,佢驚我俾人呃,擔心間公司唔穩陣、收入又唔穩定,想我做番寫字樓、政府工,但慢慢做落畀咗好多信心佢,o依家都好支持我。」

  不過Heidi直言入行初期零收入,仲要向公司借糧,每月得3000蚊用,成日食快餐店,幸Super Girls五女於頭一年已還清債項。問是否因此激發她做生意賺大錢?她表示搞B.T.T.Y.純粹為興趣,拍檔們為追求最佳出品,更選擇本地及加拿大製作,連同宣傳等使費,分分鐘冇錢賺,似乎Heidi都唔叻揸數!她笑道:「冇在意囉,要使就使,但做咗生意後學識睇住盤數,變咗婆仔,o依家所有嘢都精打細算,我應該係SG入面最精明,因為我有儲錢同投資,隊長Aka先係月光族!」

  說到Be Yourself,Heidi稱曾為另一半改變性格令自己唔開心,「試過同另一半嘅價值觀相距愈來愈大,佢唔明我點解咁夜收工、成日咁忙、節日又要開工。(同圈中人拍拖好啲?)好少揀幕前,因為好冇安全感,我遇過一啲唔誠實嘅男仔,走埋嚟識我但隱瞞自己有女友,好彩我發現得早,因為我曾經受過傷害,疑心比較重,所以喺約會時都會留意每一個細節,睇吓有冇蛛絲馬跡。」她又坦言恨拍拖,但暫時未想結婚,「o依家工作行先,仲有時間嘅。」

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd