首頁 日報娛樂

行外父政策 陪張父揀車 袁偉豪張寶兒 買貓同居試婚

07/02/2020
Sharp爆情侶
■袁偉豪(左)與張寶兒以「Sharp色情侶裝」到銅鑼灣逛家品店。
Sharp爆情侶 ■袁偉豪(左)與張寶兒以「Sharp色情侶裝」到銅鑼灣逛家品店。(1/9)

          現年38歲的袁偉豪(Ben)與張寶兒(Bowie)拍拖兩年多,愛得甜蜜的兩人不時傳婚訊,可惜一直只聞樓梯響。去年5月,Ben認同女友傾過結婚,當時仲話若搞婚禮都要1年後,亦不諱言袁媽媽都恨「飲新抱茶」;後來他更傳獲高人指點,再加上受去年11月做老襯的陳山聰感染,終於決定今年迎娶Bowie!踏入鼠年第一步,一對準新人便率先同居試婚,上周兩人拍住拖到銅鑼灣揀家品,又物色「心頭貓」,莫非想共同撫養貓仔先,當作做爹哋媽咪的入門訓練?最後,這位「未來好女婿」仲陪張爸爸睇車,實行行外父政策!採訪:梁志明

        袁偉豪與張寶兒於2017年因合拍旅遊節目《打工捱世界Ⅱ》而撻着,二人拍拖兩年多以來頻頻傳出婚訊,至去年9月再被爆決定今年拉埋天窗!上周三(29日)晚上約7點,兩人到百德新街的家品專門店Francfranc添置家居用品,見兩人對一張折後只售686蚊的大地氈相當感興趣,Ben仲又揭又摸,女友就喺側邊畀意見,不過唔知女人仔係咪要格吓價先呢?Bowie拎住手機影一影個花款同價錢,然後兩個再商討一輪,最終搞咗20分鐘都係冇買到。接着,Ben覆咗個Message後,兩人便走到附近的寵物店,甫進店內,他們即隔住玻璃撩貓咪玩,冇耐Ben就手指指問職員價錢,結果謹慎購物的他望多一陣,卒之都去咗另一間店再物色「心頭貓」。

引入新貓

  今次見Bowie對住個籠上下左右係咁目及,好似有心水,男友仔都好識做,即刻叫職員:「開籠,Please~」對方幫二人雙手噴過消毒酒精後,立馬拎隻體形特大嘅緬因貓給Ben抱,而Bowie就係咁捽貓咪塊面,愛不釋手 ,之後仲「挨」男友畀佢抱吓,不過做開「狗奴才」的她似乎唔多識抱貓,搞到隻「巨貓」啲手手腳腳一路沉落去,好似好辛苦咁,場面搞笑!然而,Ben於去年11月才養了一隻緬因貓Marky,短短兩個多月再添新成員,睇嚟是因為家中多個女主人,擔心「主子」呷醋,所以物色多個伴畀Marky,順道讓Bowie練習一下照顧小生命,為未來做媽咪作準備!不過最後兩人都無拎貓返歸。

融入張家

  離開寵物店後,兩人便會合Bowie的父母和細佬,到信和廣場的Jaguar & Land Rover車行,見三個男人圍住一部價值80多萬的SUV型號Evoque研究,Ben仲一直傍實「未來外父」又Check車籠又畀意見,「未來舅仔」都喺隔離密密斟,關係非常Close,看來他已經融晒入張家之中,走的時候張爸爸都笑晒口,應該都好滿意Ben的協助,最後一行五人又行番去寵物店睇貓,估唔到揀貓都要問准老人家意見,果然係一個「好女婿」!

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd