首頁 日報娛樂

Full Gear同老公去超市掃物資 拉姑怕中招 口罩打孖戴

10/02/2020
雙重防疫
■拉姑唔單止戴黑超,仲戴「孖罩」保護自己,可惜戴錯方法!
雙重防疫 ■拉姑唔單止戴黑超,仲戴「孖罩」保護自己,可惜戴錯方法!(1/8)

  新冠肺炎殺到埋身,當全城鬧「口罩荒」之際,身為高危一族的狄波拉(拉姑)和老公鬍鬚Kong就好好彩,屋企仍有存貨,估計仲要係「口罩富有族」O添!事關,拉姑日前到中環city'super補貨時,不單止戴晒外科口罩,更打孖上兼架上墨鏡護目,雙重保護好似好安全!不過,根據專業人士所講,戴多層口罩會有反效果㗎,大家千祈唔好學呀!

新冠肺炎疫情持續擴散,本港確診個案至今已累積超過20宗,惟政府仍然堅拒「全面封關」,市民只好搶購口罩自保,無奈市面一「罩」難求,令全城陷入恐慌!日前,政府亦呼籲大家盡量減少外出,以節省口罩用量及避免感染病菌,加上物資短缺的謠言不斷傳出,市民再次掀起另一場糧食、廁紙、防疫用品等搶購潮!日前下午4時許,本報記者發現狄波拉(拉姑)與老公鬍鬚Kong,帶埋工人姐姐到中環IFC的city'super入貨,其間掃了一些麵包、汽水、牛油果等,數量尚算正常。

緊張大師

  現場所見,3人都「蒙晒面」做足防疫措施,估計他們都冇乜「缺罩」煩惱,事關仔細一看,原來拉姑好「奢侈」地口罩打孖戴,看來她也非常擔心會「中招」!但又難怪拉姑咁緊張嘅,已年屆68的她確實屬於高危一族,萬一Touch Wood唔小心惹到「武肺」,真係可大可小。不過,不得不提醒各位家庭觀眾切勿模仿,皆因拉姑的「孖罩法」絕對是一個錯誤示範!根據國家衞健委專家組成員蔣榮猛指出,戴多層口罩會影響氣密性,容易漏氣,同時令呼吸受阻,佩戴者大力吸氣會更易受感染,可謂弄巧反拙!

學戴口罩

  又不知家中年輕一輩是否各有各忙,完全冇人教兩老戴口罩呢?與此同時,拉姑連口罩也沒有向下拉開好好包實下巴。結果,記者見狀都忍唔住上前跟她傾兩句,問到是否買餸親自下廚?她說:「唔係,諗住嚟入少少貨啫。」那麼出動兩個口罩,是否好擔心疫情?拉姑說:「唔係,因為成日講嘢(口罩)會郁!」隨即經常要闖蕩街頭的記者教她正確的戴罩方法,拉姑才恍然大悟:「喔~我真係唔識戴呀!」語畢拉姑感激地即叫老公派利是給記者,離開商場時,沿途更有保安特意上前向兩夫婦拜年,他們都來者不拒,利是人人有份永不落空。

採訪:張詠森

其他文章
hd