首頁 日報娛樂

同余安安拍《Baby》勾起生B事 張繼聰險為謝安琪撞開全村車

17/02/2020
■安安姐和阿聰大讚《Baby復仇記》劇本夠貼地,講出不少準父母的心聲。
■安安姐和阿聰大讚《Baby復仇記》劇本夠貼地,講出不少準父母的心聲。 (1/6)

        余安安和張繼聰在剛上映的新戲《Baby復仇記》分別演準嫲嫲和星級男陪月,早已為人父母的他們,在拍攝過程勾起不少生B難忘事,好似安安姐就想起當年初三赤口誕第二胎既搞笑又緊張的情況;而阿聰就大爆當年太太謝安琪(Kay)生囝囝張瞻時穿羊水,住村屋的他緊張到想將全村車撞開搵出路送太太入院,似十足拍動作片勁誇張。

現實中,安安姐和阿聰雖然冇做嫲嫲和男陪月經驗,但兩人自身經驗對演繹角色都幫到手。安安說:「我做咗外母,其實對新抱同對女婿都一樣,會錫仔女嘅另一半,所以我代入會容易啲。」由於現實中沒男陪月,阿聰反而覺得更有趣,「我太太第一胎係冇陪月,但真係差好遠,特別係太太身體調理方面,我好記得我Book嘅時候佢話3日後先覆,因為開工唔會開電話,好似特工咁好專業,我將佢哋份精神放咗入角色度。」

  兩人都話拍攝最難忘是勾起不少當日生B的經歷,當年首次做爸爸的阿聰,更自爆由於太緊張,差啲出大事,「當年我哋住村屋,夜晚啲車泊好晒,要出車係好困難,太太話穿羊水,我跑去攞車,但係揸出嚟好難,我好緊張,諗過將成條村啲車撞開晒佢,返嚟先搞,太太反而叫我慢慢嚟。(阿Kay冷靜過你?)係呀,可能自己身體自己知,我係急到咁。」安安姐原來生兩胎都一樣驚險,「第一胎唔係好穩,要喺牀瞓咗3個月,真係好擔憂,去洗水間大力啲都驚走咗出嚟冇咗;而第二個就早產,細女初二出世,我初二傳統返阿媽度食飯,我食咗3碗飯,半個鐘後仲叫阿媽煎糕,阿媽仲話又食?食到塞咗個BB出嚟!點知真係食完半夜作動喎!我兩胎個頭都係唔調轉,都係要開刀生。」

撰文:杜淑霞 攝影:李權威

其他文章
hd