首頁 日報娛樂

唔使宣傳 閉關太耐好口痕 林保怡約友飲茶 開「Talk show」

30/03/2020
指手畫腳
■食飯期間,把口冇停過的林保怡講到手郁郁。
指手畫腳 ■食飯期間,把口冇停過的林保怡講到手郁郁。(1/9)

        林保怡(Bowie)早前再跟ViuTV合作,為新劇《歎息橋》兼任監製和演員,雖則在港播放日期還未定,但早前他已宣佈劇集會於本月28日率先於內地網啟播,無奈新冠肺炎疫情持續,暫未能返內地宣傳的 Bowie,近日只好匿喺屋企做「宅男」。除了於社交網Throwback吓旅行相,得閒又化身「煮飯佬」騷廚藝,早前 Bowie留言:「食不言寢不語。」他卻自打嘴巴,日前他相約友人去西貢市中心飲茶,邊食邊發表偉論,見Bowie把口冇停過,相信都係「閉關」太耐,口太痕!

採訪:張詠森

        現年54歲的林保怡於2011年約滿無線後,便主力於北京、上海拍劇和電影,成功打開內地市場,仲賺到盤滿鉢滿!可惜5年前,因呼吸系統出現問題,他便將基地搬回香港,間中有Job才北上;而近期,繼2016年演出劇集《瑪嘉烈與大衞》系列後,Bowie再度跟ViuTV合作,為新劇《歎息橋》兼任監製及演員。該劇後期早已完成,雖然ViuTV方面仍未公佈播出日期,但內地優酷網則於上周六搶先播出。



落街食飯

由於新冠肺炎疫情持續,不少藝人都選擇留港「避炎」。日前Bowie和拍檔周家怡惟有透過網上直播節目《好好吃飯》做宣傳,未料節目中,他因為在一個「蝸居」中下廚,而被內地媒體誤傳經濟拮据住細屋,事後Bowie亦已向傳媒澄清:「間屋係節目組搵嘅,唔係我屋企,我兩年前已經喺西貢買咗間近海望山嘅屋啦!」其實出入都以名車代步的他,荷包可謂脹卜卜,近年仲開埋影視製作公司,而日前趁唔使開工,Bowie就相約友人到西貢市中心食Lunch。

邊食邊傾

當日下午1時許,二人在碼頭旁邊的海鮮酒家飲茶,雖然一盅兩件冇夾餸食飯咁大風險,但見Bowie好似開籠雀咁,全程講嘢多過食嘢,講到肉緊時仲指手畫腳,睇見啲口水係咁噴,唔知同枱老友有乜感想呢?好在其老友都明顯是個Good listener,一邊低頭密密食一邊靜心聆聽,最後掛住吹水的Bowie應該都食唔飽,埋單兼打包返去繼續食。離開時,兩人都乖乖地戴番口罩,途中撞到兩個老街坊,他都好Nice地停低傾兩句,講夠又登上座駕駛返屋企,繼續「閉關」。

其他文章
hd