首頁 日報娛樂

深水埗派口罩畀長者 范振鋒李思欣派到喊

31/03/2020
■范振鋒逐層樓派口罩入李鄭屋邨的住戶信箱。
■范振鋒逐層樓派口罩入李鄭屋邨的住戶信箱。 (1/7)

  范振鋒喺疫情下工作量大減,就算冇工開,兩公婆都唔畀自己停落嚟,仲出錢出力落區派口罩,好有善心!雖然只係出點綿力,但公公婆婆非常開心,搞到兩公婆感動到眼濕濕!採訪:方騫平

  之前范振鋒、李思欣聯同公司藝人黃進林、鄭仲恒低調去咗深水埗李鄭屋村派口罩畀長者:「佢哋最缺乏,亦係最需要呢啲物資,冇口罩就足不出戶。今次我哋同明愛鄭承峰長者社區中心合作,派口罩畀100戶長者,10個一包。為免長者要排隊辛苦,我哋先去中心入口罩,然後按資料入落信箱,由社工聯絡佢哋開信箱拎。」

  洗完樓,眾人沿途再派畀一啲清潔工同執紙皮婆婆,「其中一個年紀較大嘅女工友話,公司每日只配給一個口罩,所以千多謝萬多謝我哋,仲祝福我哋健康,見老人家反應咁大,我同思欣感動到即時標眼淚,其實我哋只係好小嘅心意同力量,大家只係夾咗少少錢,換來人哋講足多次感謝,係意想唔到嘅事。」因此,阿范承諾會繼續做善舉,因為中心方面都想大家知道深水埗基層的苦況,需要多啲人關懷。

  范振鋒在疫情下還有電台及娛樂公司工作,每周三日有工開,都好過食白果。至於思欣就好好彩,因為簽落兩個廣告,收咗訂金,稍後補拍。問到可會趁空檔來「造人」?阿范即耍手擰頭:「咁嘅時勢唔好住,搞掂自己先,等個世界好啲再算。」至於之前有份投資的飲食生意幾乎全部已退股,不受影響。

其他文章
hd