首頁 日報娛樂

貽興狂鬧 轟滯留秘魯港女惹爭議 項明生笑言 絕冇留言讚自己

01/04/2020
重火藥味
■王貽興出post咬住項明生唔放,好重火藥味。
重火藥味 ■王貽興出post咬住項明生唔放,好重火藥味。 (1/9)

        滯留秘魯港人S小姐向傳媒求助,抱怨隔離期間旅舍膳食太差,旅遊達人項明生(James)睇唔過眼在網上平台批評「明知外有毒,偏向病毒行」。批評風波愈滾愈大,作家王貽興更在社交網站發帖狂鬧,怒插項明生斷章取義抹黑S小姐。同王貽興從沒積怨的項明生被辣㷫對此回應,「我諗有人宅喺屋企要有存在感,呃啲like返嚟。」對於在fb專頁留言讚自己被cap圖瘋傳,James強調無做過,「點會自己同自己講嘢咁好笑?」採訪:方騫平

        

對於今次突然成為箭靶,項明生堅持以事論事,絕不後悔!他說:「我覺得有啲人將好簡單嘅事套入政治立場,原先只係話個女仔食得鹹魚抵得渴,去旅行預咗有啲咁嘅狀況,呢啲自己解決啦!你點解要係咁埋怨,怨天尤人?王貽興就對號入座,加入政治色彩鬥爭,咁樣會令到社會好撕裂,我覺得唔同政治立場唔係勢不兩立嘅,做人要講道理,講邏輯、講思維。我同王貽興無怨無仇,淨係喺書展見到面會打兩個招呼,大家完全係無接觸,我唔知點解佢突然用啲好人身攻擊嘅嘢,喺佢個fb寫埋粗口攻擊我,我諗有人要有存在感,想搵啲眼球,呃啲like返嚟,可能呢個時候啲人宅喺屋企悶得滯啩。」

無喺墨西哥掃口罩

  被王貽興指責「有口話人」的項明生在今年二月疫情開始嚴峻下繼續出發去日本旅行,又指他於墨西哥旅行時,掃晒當地口罩及消毒用品,之後放上網呃Like。James解釋去日本係為和歌山觀光局工作,履行工作合約。同時,他沒有狂掃口罩:「我帶團友喺一月尾去墨西哥,當時嗰度一單確診都冇,每個團友淨係買到5個口罩,搓手液每人3支,包括我在內,其實好多香港人都喺海外買口罩啦。因為我同所有團友嘅物資一齊影咗張相,啲人以為我好多貨。」

無自問自答

對於有網民發現他喺自己的fb專頁留言讚自己「鬧得好寫得好」,James帶笑回應:「我唔知張相喺邊度嚟㗎喎,我又冇自問自答,o依家網絡上面有好多PS、好多騙案,啲人就以訛傳訛,我可以講,我從來冇自問自答,點會自己同自己講嘢?我覺得好好笑,得啖笑,今朝笑咗好耐呀!哈!我真係覺得好好笑呀,點都好啦,新冠肺炎全球大流行,o依家大家好需要正能量嚟抗疫!反正外遊工作被逼煞停,留港空檔則用嚟做善事,之前我落咗深水埗同明哥派咗300個飯盒畀露宿者,我仲捐咗300個fans送嘅口罩畀佢哋,反正我都夠口罩用,希望人人有罩用,齊心來抗疫。」

提早拍攝被讚有腦

  James表示,喺2月初,眼見鑽石公主號確診數字係咁升,覺得當中會有好多變數,所以提議去日本的拍攝工作改早半個月,免得夜長夢多:「最後連和歌山觀光局都讚我勁,有先見之明知道會封城,其實我純粹係猜測,因為我鍾意日本,知道日本決策要穩陣,往往會慢幾拍。由於和歌山唔係大城市,而且今次主要深入冇乜人到嘅秘境,其中去咗天滿宮、東召宮睇梅花,兩個神宮都冇人,相對和歌山冇大城市氣氛咁緊張,較重災區北海道較安全。我又喺德川家康嘅城堡扮成將軍,寫繪馬為香港祈禱,仲好好彩喺鄉下地方僅用正價100日圓(約7元港幣)買到最後一包粉紅色小童口罩。」

其他文章
hd