首頁 日報娛樂

蘇格蘭過五星級隔離生活 喬寶寶有幾聲咳 好驚中招

07/04/2020
家居隔離
■隔離期間喬寶寶日日要量體溫,進行醫學監察。
家居隔離 ■隔離期間喬寶寶日日要量體溫,進行醫學監察。(1/10)

        新冠肺炎全球大流行好易中招,香港土生土長嘅印籍藝人喬寶寶喺3月26日已順利返抵蘇格蘭「交人」,但坐完長途機後翌日出現喉嚨痛病徵,仲有幾聲咳,寶寶坦言都幾驚,覺得好攰,無神無氣攤喺牀嘅寶寶表示:「好彩飲咗幾劑喬嫂嫂炮製嘅薑黃粉牛奶後病情有改善,但仍然密切監察中,唔可以掉以輕心。」雖然要隔離,但喬嫂嫂超好服侍,一日三餐有魚有雞送到寶寶的隔離房門口,堪稱五星級隔離生活。

返抵蘇格蘭享受家庭樂的喬寶寶正展開14日嘅家居隔離生活,成面鬚根的喬寶寶拍片分享「禁閉隔離14日無福利」的生活:「喬嫂嫂同我講:『呢張牀係你㗎喇,呢14日你食自己啦!』佢搬咗去同細仔瞓。朝朝起身就探熱,睇吓有冇燒,因為返到嚟第2日有少少喉嚨痛同咳,都以為瀨嘢,所以老婆出入送餐時,我都要戴住口罩,費事傳染到屋企人。」

古法配方舒服晒

因為飲咗老婆的愛心薑黃粉牛奶,寶寶舒服番晒。「呢個係醫傷風感冒同關節痛嘅古法配方,一杯350ml牛奶加一湯匙薑黃粉就得,薑黃粉我多數喺印度店舖買,再落啲蜜糖咁會好飲啲,瞓覺前飲就最有益,但我都有密切監察住,睇吓病情有冇再嚴重,事關平日我都會有幾聲咳,而且冇發燒又冇肚屙,冇理由得幾聲咳就去求診。」悶到發慌的寶寶自拍獨守空房狀況,佢透露平時喺「隔離睡房」上網,或者打電話畀親友解悶。寶寶笑言以往好少打畀親友講電話,「佢哋唔知我悶,仲讚我好有心。」

自己洗衫自己晾

寶寶房間對面就是細仔房,為安全起見,佢同細仔要隔住兩道門傾偈。「佢間房設備非常齊全,有電腦同電視機,仲好過我,不過我都OK嘅,獨享套廁,仲有淋浴間,雖然有鬚刨,但我冇剃鬚,呢度都唔使見人。」語畢,他打開大櫃檢視:「平日會見到喬嫂嫂啲靚衫,o依家得番我嗰啲。」鏡頭一轉去到後花園:「老婆鎖咗我喺後花園叫我自己洗番自己啲衫同自己晾埋,呢度啲衫全部係我嘅,咁都啱嘅,最慘要自己燙。每次都要清晒場,我由後門入去洗衫,喬嫂嫂唔畀我由正門出入,佢話:『呢兩個禮拜你都冇運行!』」

隔離餐單好豐富

        寶寶坦言返到屋企,見到屋企人好開心點會悶吖!雖然只係遠距離見過大仔「印度豹」及醫師新抱仔,但都開心到暈,唯一喺隔離期間未見過年老媽媽。他又指喬嫂嫂一日送上三餐,餐單有咖哩魚、咖哩四季豆、咖哩雞配薄餅及意粉,仲有香料奶茶及薑黃牛奶加蜜糖:「我唔使講想食乜,佢會自動自覺,佢知我鍾意食乜飲乜,一日三餐都提供唔同食物,我梗係話佢整得好味啦,又唔使我下廚,總之舒服過住五星級生活。」

採訪:方騫平

其他文章
hd