首頁 日報娛樂

58歲做運動傷頸心情唔好 杜德偉夫婦 怒火街頭

15/05/2020
火藥味濃
■杜德偉與太太Ice於中環街頭嗌交。
火藥味濃 ■杜德偉與太太Ice於中環街頭嗌交。(1/9)

          58歲杜德偉(Alex)去年12月於北京展開巡唱,惜碰上新冠肺炎,其他站的演出均要延期舉行,樂得清閒的Alex就趁機陪太太李曉冰(Ice)和3歲兒子AJ。早排一家三口去馬騮山遠足,Fit爆的他更獲蘇永康大讚「永遠都係偶像派」。Alex Keep得好全靠勤力健身,惟最近他做運動時整傷,近月要戴住頸箍出街。可能天氣熱加上戴頸箍唔舒服,日前見到心情麻麻嘅「永遠偶像」相當好火氣,跟老婆在中環街頭吵大鑊,好在隔咗一個禮拜,二人又Sweet爆去又一城食Tea,兩公婆又點會有隔夜仇吖?採訪:李維隆、譚壹致

        杜德偉和太太李曉冰早前撇低囝囝出中環,當日下午約3點,兩人於威靈頓街等車,穿上牛仔衫褲、戴Cap帽的Alex頸上多了個箍,而且造型都好特別,驟眼睇有啲似笠住BB廁板!其間,傾得好哋哋的兩人不知為乜嘈起上嚟,Ice更愈講愈勞氣,Alex駁了兩句就收聲,以為告一段落,點知一見太太耷低頭,他即轉身用手指喺魂精位「係咁圈」意味黐線,究竟咁大膽話老婆?抑或針對講緊的話題呢?之後他又借尿遁,一齊入咗附近商場去廁所,沿途Alex亦拍拍Ice釋出善意,惟上車前,見到記者上前打招呼,兩公婆卻充耳不聞急步上車。

冰釋前嫌

  正所謂「牀頭打交牀尾和」,事隔一個多禮拜,杜氏夫婦又恩愛到又一城Greyhound撐枱腳,席間二人脫下口罩一邊食一邊傾,是日Alex心情勁好,連飲啖水都望住老婆甜笑,So sweet,不過提醒一吓呢位爸爸,近日疫情雖然稍為緩和,但周圍摸完仲咬手指、咬眼鏡,似乎唔多衞生!食足兩個鐘Tea後,夫婦倆又外賣多盒Cake,相信是買給為食囝囝;離開商場時,仍戴住「廁板箍」的Alex卻不顧頸傷,繼續狂撳手機做「低頭族」,但最好笑係等車的10分鐘之間,跳開舞的Alex都按捺不住周身郁,又狂轉眼球,甚至如機械人般僵硬地左右擰,神情趣怪!

懶做熱身

  事後慰問Alex老婆有關Alex傷勢,Ice以短訊回覆:「冇嘢,佢喺屋企做運動扭親吓。」當記者笑住問為何如此搏命?她說:「懶做熱身,下次會注意,其他唔講啦,謝謝。(幾時受傷?有冇睇醫生?)都係嗰句,唔講咁多啦,唔係咩咁大件事啫,多謝關心。」最後,Ice僅透露老公至少要戴頸箍1個月,其後公關來電強調Alex並非「古靈精怪」整傷,相信他咁Fit會好快康復。

其他文章
hd