首頁 日報娛樂

直擊曼谷逐步解禁 胡慧冲寫歌為泰國打氣

19/05/2020
■胡慧冲喺錄音室灌錄打氣歌,出錢又出力。
■胡慧冲喺錄音室灌錄打氣歌,出錢又出力。 (1/6)

  港人熱門旅遊地方泰國嘅緊急狀態令Extend多一個月,至6月1日才能通關,喺呢段繼續抗疫的日子,居泰港人胡慧冲(Roger)除咗日日喺自家YouTube頻道《等緊31》update曼谷市面狀況外,仲自資幾萬港元錄製新歌《Take My hand Thailand》發放正能量,為泰國人打打氣。

採訪:方騫平



  打氣歌係胡慧冲第5首作品,之前的都同旅遊節目《冲遊泰國》有關:「負責作曲同填詞嘅係我音樂人老友,《冲遊》主題曲同插曲都由佢一手包辦。新歌有中文、英文及泰文詞,四句中文詞『今天縱是苦困,仍笑笑把歌哼,珍惜每秒沒有恨,同度過同感恩。』由我親自填寫,好有許冠傑Feel!」問到反應如何?他說:「好壞參半,有人好欣賞,特別話歌詞寫得好好,但亦有人表示不滿話『只係鍾意睇你介紹旅遊節目,聽你唱歌會unlike你!』但呢啲負評唔會打擊我信心。」

  胡慧冲又補充,指唱歌雖然唔係佢強項,但至少唔會唱到走音。「我都曾經參加過第一屆新秀歌唱大賽入咗20名,只不過俾黎小田叮走咗。我覺得自己活到呢個年頭,又唔係靚仔同出名,作為旅遊達人可以做到創作歌同娛樂節目,仲得到小小認同經已好滿足同開心,會出錢出力繼續玩落去。」至於泰國狀況,他表示愈來愈好, 5月3日開始部分商店及設施重開,包括四面佛,餐廳亦放寬可供一半座位堂食;髮型屋只限剪髮、洗髮,惟夜間宵禁及禁酒令就仍維持至5月底,至於周末翟道翟市場嘅商店只係開咗一半,遊人未算太多,但預防措施都做得好好。另商場及百貨公司亦全面開放。

其他文章
hd