首頁 日報娛樂

停巡演收入大減 布志綸登記做Uber司機

28/05/2020
■布志綸坦言如果耗盡積蓄,唯有做uber司機,唔會問家人攞錢。
■布志綸坦言如果耗盡積蓄,唯有做uber司機,唔會問家人攞錢。 (1/6)

  雖然疫情漸趨緩和,但香港氣氛仍然唔好,所以樂隊Mr.主音布志綸(Alan)推出新歌《喘一口氣》:「做音樂可以紓緩大家情緒,既然喺迷失時候,大家都想尋求新方向,但又搵唔到,倒不如當自己係羽毛,嘗試飄去拍MV嘅布拉格,感受現實以外嘅嘢,咁樣會relax啲。」採訪:方騫平

髮型:Terry Yeung @ Hair Corner K11 場地:Amelia @ Harbour City

  疫情爆發至今,布志綸相信大家都唔開心,希望香港人能夠藉住他的新作暫忘四分鐘現實:「呢個時候派歌唔會有商業上得益,但大家都要娛樂,自己唯有做得幾多得幾多,如果大家聽完首歌係會舒服咗嘅,咁我咪成功囉。」

人生苦短要珍惜

  Alan又指《喘一口氣》因曲風同路向跟Mr.的歌好唔同而惹來奇怪負評:「有樂評話我脫離咗Mr.搖滾光環,做呢啲歌冇乜特色同個人風格,其實Mr.嘅歌我唱咗10年,先想試吓搵唔同嘅嘢,我喺音樂圈打滾咗11年,明白冇可能討好全世界,只會享受製作音樂過程!」Alan強調人生好短暫,疫情由一個地方去到全世界,好多人失去生命,既然有諗法又有時間就做咗佢,「唔好浪費自己光陰,唔係一定要有偉大理想,講真做音樂有幾偉大?呢個圈令我急速成長,以前Mr.五個傻仔乜都唔識,每步都係學習,睇返MIRROR,感覺好似當年Mr.,盲樁樁去衝,呢團火係好睇嘅。」

  最後Alan強調自己入行多年,要燃起另一團火,「好似威士忌咁,年份唔同有唔同味道。」另外,Mr.今年的巡演已取消:「好慘失晒預算,生活難過,為咗養妻活兒,我經已登記咗揸uber,所以大家見司機係我個名,唔好問點解,有幾奇啫,冇放唔低身段呢回事。」

其他文章
hd