首頁 日報娛樂

主持育兒節目乘機偷師 黃澤鋒望囡囡快樂成長

06/06/2020
■澤鋒希望囡囡快樂成長,即使面對逆境也要戰鬥到底!
■澤鋒希望囡囡快樂成長,即使面對逆境也要戰鬥到底! (1/6)

  53歲黃澤鋒與太太陳麗麗去年老來得女,自然將萌B「小黃妃」黃𤋮恩寵到上天,近日為香港開電視育兒節目《我的志願速成班》任主持的他,亦乘機向一眾專業人士偷師。問是否望女成龍?他只希望囡囡快樂成長,又慨歎:「自從多咗個小朋友感覺唔同咗,而家想老啲先死,想睇到佢最少大學畢業,如果睇到個孫出世仲好,但唔知自己有冇咁長命。」採訪:黎寶倫 場地:The AIR (The ONE)

  此次《我》節目中,邀得不同成功人士分享育兒之道,去年7月才榮升老竇的黃澤鋒認為:「小朋友將來做乜,係要用唔同方法培育,但最重要係佢哋有興趣。」難道不渴望女兒繼承衣鉢做女飛魚嗎?曾是香港游泳代表隊成員的他私心說:「想!我都希望自己攞獎嘅項目,個女都可以攞到,咁就老懷安慰。」但謂人生苦短,不會強迫囡囡做任何事去破壞兩父女的感情,澤鋒感性地說:「坦白講我90歲時,佢先30幾歲,所以盡量令佢快樂人生。我同太太都唔想成為佢負擔,所以呢十年八年會快快搵多啲,Set一個好家庭、好位置畀佢行,唯一要求係要佢好好讀書。」

做人唔好悲觀

  提到受疫情影響,年初四起主要收入來源遭截斷,澤鋒卻表示絕不悲觀,「我成日同自己講聽日一定會好,最多重頭嚟過,留得青山在哪怕冇柴燒,樂觀其成囉。」面對社會一片愁雲慘霧,他稱將來都會教囡囡要逆境自強,「人生係一個過程,要為理想而戰鬥到最後一刻!唔好因為而家嘅環境將你人生改變,Set咗咁行就要堅持,過程崎嶇咪用意志走過去囉!」

其他文章
hd