首頁 日報娛樂

囡囡復課 買食物盒買文具買玩具 黃貫中朱茵激罕親女樂

19/06/2020
溫馴老竇
■在愛女面前,火爆Paul即變慈父,連型仔斜孭袋都攞嚟裝水壺。
溫馴老竇 ■在愛女面前,火爆Paul即變慈父,連型仔斜孭袋都攞嚟裝水壺。(1/10)

         一代性感女神朱茵自2012年下嫁黃貫中(Paul),並於同年誕下女兒「叉燒包」黃鶯後,她便淡出幕前專心相夫教女。至囡囡日漸長大,近年朱茵才復出主力北上發展,前年更罕有地一家三口齊上內地真人騷《想想辦法吧!爸爸》,惟新冠肺炎自去年底於內地大爆發,她只好留港避炎。日前,黃氏一家三口到又一城行街,此行主力為將復課的囡囡添置新用品,包括食物盒及玩具,而一向畀人印象好火爆嘅Paul就陪囡囡揀文具,畫面罕見得嚟非常溫馨。

        受新冠肺炎疫情影響,本港所有學校已停課約4個月,近日才陸續復課,本周一就輪到小一至小三可以返學。日前下午4點,戴上口罩的朱茵和Paul帶7歲囡囡去又一城買嘢,一行三人先去餐廳攞位,由於假期人多,問了兩、三間都係白行一趟,冇得食就惟有去Logon睇食物盒,而步行去舖頭途中,「叉燒包」忽然將孭住的水壺遞畀爸爸,Paul好聽話地接過,並放進自己個型格斜孭袋入面,阿Paul彈結他就見得多,拎囡囡水壺真係第一次見!

親自下廚

        在揀食物盒時,朱茵踎低慢慢研究,見佢揀咗半個鐘就入手起碼7、8個不同款的食物盒,可能囡囡見食物盒清一色透明好單調,所以就嗲媽咪買番個好重少女味的桃紅色膠盒,好彩朱茵都好易話為,任囡囡揀!揀完盒,朱茵忽然「失蹤」,剩低Paul陪愛女試原子筆,見囡囡試完呢支又試嗰支,Band友爸爸無唔耐煩,仲化身「書僮」企喺「叉燒包」後面安靜地等,最後梗係負責畀埋錢兼拎嘢啦!

囡囡大晒

        此時,朱茵再度現身幫囡囡消毒手仔,之後便跟父女倆去玩具反斗城。甫進店,看到時下妹豬至愛的L.O.L.公仔,「叉燒包」睇到眼都唔眨,更介紹畀身旁嘅陌生姨姨,最後佢揀咗一個波波及兩大盒一樣嘅套裝,估計其中一盒是送畀朋友仔;臨埋單前,「叉燒包」又獨自行去睇Barbie公仔,好快便睇中一盒屋仔套裝,不過幫囡囡「的」住大袋戰利品的爸爸似乎嫌對方買太多玩具,於是開始「o依o依哦哦」,但朱茵見囡囡咁鍾意,最終都批准買埋,Paul亦投降做「咕喱」,滿載而歸的「叉燒包」就兩手揈揈開心返歸。

採訪:譚壹致

其他文章
hd