首頁 日報娛樂

構思食譜加煮食一腳踢 江美儀做主持大嗌頭暈

22/06/2020
■江美儀、三姐互補不足,絕對係好拍檔。
■江美儀、三姐互補不足,絕對係好拍檔。 (1/7)

  繼《街市遊樂團》後,江美儀再主持飲食節目《女人必學100道菜》,拍檔就換咗私房菜老闆兼名廚三姐, 25集節目中共做100道菜,每集美儀要負責煮一個餸。拍住大師級人馬大展廚藝,美儀唔怕班門弄斧,反而好有火花。

採訪:方騫平 攝影:李維隆



  新節目將於7月27日推出,日前江美儀和三姐到朗豪坊街市選購海鮮、雞肉及墨魚滑等食材,兩人出現好受街坊歡迎,美儀仲同檔販有講有笑。美儀說:「其實我係烹飪節目初哥,以前喺亞視時代同鮑姐(鮑起靜)、饒珮君等做過婦女節目《下午麼麼茶》,不過當時只係企喺側邊睇人煮餸,今次好多嘢要由三姐提點,而佢唔太熟做主持,我哋互補不足。」三姐指美儀係佢偶像,雖然廚藝未算專業,但好叻又有天份,美儀就說三姐係佢夢中情人,以前拍戲放飯成日去食店幫襯佢。

  食素為主嘅江美儀,喺節目中主要教做素菜,如芋泥雪蓮子杏仁茶,三姐就做釀脆皮海參、堂焯麻香星斑、梅子海鮮波子飯等有體面菜式。美儀笑說:「烹調海鮮、肉類梗係交畀三姐啦,我每集諗一個簡單素菜都好頭暈,原先以為由TVB提供食譜,原來由構思到上菜要一腳踢,今次幾乎考起我,好彩我都有幾道撚手菜,有啲係嚟自爸爸同朋友嘅菜,唯有一次過晒冷。」喺疫情下仍然有節目做,她形容好感恩:「節目中除咗教人煮簡單餸菜外,最緊要係帶出開心訊息。」

其他文章
hd