首頁 日報娛樂

疫情下首演舞蹈劇場 泰臣預全程戴口罩演出

26/06/2020
■泰臣自言是易流汗,戴口罩排練連口罩都會濕透,但他笑言當減肥。
■泰臣自言是易流汗,戴口罩排練連口罩都會濕透,但他笑言當減肥。 (1/6)

  泰臣將於7月3至4日首度跟「城巿當代舞蹈團」合作演出合家歡舞蹈教育劇場《實習魔法師的生命練習題》,他笑言從沒想過能參加舞蹈演出,視為一個大挑戰。跟泰臣認識多年的導演梁曉端就認為他太謙,他除跳舞不差,最重要夠入屋好適合今次劇場演出。 疫情下要戴住口罩排練,泰臣跟其他舞者特別辛苦,他們亦有心理準備到時要全程戴住口罩演出。 採訪:杜淑霞

  泰臣今次有機會參與,只因跟該劇導演兼該舞團副藝術總監(教育)梁曉端識於微時,「我哋10年前喺劇團時合作咗兩、三年,嗰時大家都係演員,劇團唔係好多人,演員之間合作都頻密,大家真係一齊捱,經歷咗好多嘢好熟絡。」導演梁曉端解釋,「我印象中泰臣跳舞都OK嘅,同埋佢夠入屋,好適合今次合家歡嘅主題,同埋舞蹈演出好多時啲人會以為比較沉悶,有佢喺度希望令觀眾改觀,會容易啲投入到套劇度。」

  不過,泰臣坦言對自己跳舞冇乜信心,「我覺得自己柔軟度算OK,但係真係唔算識得跳舞,我覺得佢哋好勇敢夠膽邀請我,所以我會當係一個挑戰嚟,同埋近年都係電影同電視為主,真係餓咗好耐舞台演出。」但該劇編舞林詠茵不太認同,「當然我唔會當係佢一般舞者,但排練咗一段時間,我發覺不停加嘢畀泰臣,佢其實都會應付到。」

  疫情下,這天排練泰臣跟其他舞者不單全程戴上口罩,該劇更預備到時演出表演者會全程戴口罩。導演梁曉端說:「呢個係我哋今年正式喺舞台演出嘅劇場,之前都係用視象形式,所以我哋會特別小心,雖然會隔開坐,但都預咗演出者係戴住口罩。」由於泰臣演的「實習魔法師」除舞蹈,還有好多戲劇元素要依靠面部表情,所以會因應疫情再作決定會否戴口罩演出,但他已有心理準備,「就算戴住口罩都冇問題,我有晒心理準備靠眼神嚟表演,或者到時喺眼部化妝加強啲去幫助囉!」

其他文章
hd