首頁 日報娛樂

老婆下月生B 努力搵奶粉錢 43歲陳山聰 街頭肉搏兩粒鐘

26/06/2020
濕身肉搏
■陳山聰同動作演員埋身肉搏,完全唔留力,睇吓件衫都濕晒。
濕身肉搏 ■陳山聰同動作演員埋身肉搏,完全唔留力,睇吓件衫都濕晒。(1/10)

        43歲嘅陳山聰下月榮升爸爸,奶粉同尿片錢都好貴,所以山聰經常將養妻活兒努力搵錢掛喺口邊。日前下午,山聰為新劇《超能使者》拍外景,劇情講佢以一敵二,當日氣溫高達34度,山聰埋身肉搏,拳來腳往打足兩粒鐘,打到全身濕晒,搵錢艱難,山聰滴住汗表示,「以前嗰個唔係我嚟,o依家好開心,係好嘅開始,所以乜都要勤力啲囉!」採訪:方騫平 攝影、李維隆

        之前陳山聰喺《兩個小生去camping》中毫不避忌,大談過去「黑材料」,自嘲以往嘅負面新聞全世界嘅華人都知,佢要撥亂反正,面對自己,他還真情剖白:「因為呢啲經歷令我o依家咁開心,更珍惜身邊一切,我希望60歲時,太太同個仔有安定生活。」山聰果然言出必行,腳踏實地努力搵奶粉錢兌現承諾,拍完《超能使者》緊接拍《今宵大廈2》。問到劇接劇係咪BB旺他?他笑嘻嘻說:「都係啦,最緊要開心。」

打到底褲都濕埋

  山聰在《超能使者》中有唔少喪打場口,日前先嚟一次小熱身,講山聰拖住着小背心、熱褲露腰仔嘅劉穎鏇(Tiffany)返屋企煮飯仔,途中見義勇為,出手阻止兩名歹徒欺凌女人仔甄詠珊。當日天氣好熱,喺條街拍外景焗到癲,但山聰依然打得相當落力,拍前先試位,一roll機就係咁同兩位動作演員埋身肉搏,箍頸、抓面、反身、起腳、出拳及膝撞等乜都有,打到手臂「老鼠仔」都出埋,仲要墊pad捱木棍打背脊。雖然好多動作都一take過收貨,但兩分鐘鏡頭都玩咗兩個鐘,拍到山聰全身濕晒,淺灰色Tee濕到變深灰,連底底都濕埋,成身汗臭味,要急急換tee除臭。而鏡頭外食住豆腐花嘅Tiffany就大讚山聰好專業。

山聰鍾意拍打戲

  山聰事後承認冇留力拍:「其實真係好熱,所以拍打時真係要專注啲,寧願用多啲真力,好過留咗力再拍時大家都辛苦,最吃力係要配合監製要求打得型啲,唔好乸埋塊面,又要打又要顧住個樣真係唔容易。」稍後Tiffany會加入動作行列,陳山聰睇好劉穎鏇係新一代打女:「佢手長腳長,打起嚟會靈巧啲,o依家要多元化,做新一代打女女神咪好囉,有啲羅拉feel咁!暫時女神就係女神,唔識打。」至於想做女神定打女?Tiffany好貪心話兩樣都要,打都可以好有型,唔一定兇神惡煞。

  問到山聰怕唔怕受傷,嚇親大肚老婆?他即緊張說:「我有派定心丸畀佢,除咗有少少瘀傷,拍咗咁多次打戲都未試過受傷。好多監製覺得我好適合拍打戲,因為我又有咁嘅底子,自己又鍾意,只要小心啲就得喇!作為演員多元化好,同埋呢個路線演員唔係咁多。反而有場搞笑戲,我自己打自己再擺個甫士,兩個take就拍到肩位瘀晒,連老婆都問我搞乜?」

其他文章
hd