首頁 日報娛樂

MIRROR拍新歌MV花姐被插偏心 姜濤話心照唔使安慰隊友

03/07/2020
■MIRROR再出新歌《IGNITED》,但被指「小組歌」,唔係個個有得發揮。
■MIRROR再出新歌《IGNITED》,但被指「小組歌」,唔係個個有得發揮。 (1/5)

  相隔7個月,男子組合MIRROR終於推出新作《IGNITED》,不過,「Too Hot To Handle Version」MV被網民認為經理人兼MV導演花姐大細超,偏心愛將姜濤、Ian和Anson Lo到出面。喺花姐點名下,被指係陪襯品之一嘅Alton挺身拆解:「我就係特登唔回應,因為即將有第二個版本,咁樣反彈會好大。」

  花姐出心出力為MIRROR,但Fans總有意見。正如新歌《IGNITED》被轟歌詞露骨,不符合MIRROR陽光形象;又指MV的鏡頭分配唔平均,Edan、Alton、Tiger、Frankie及Lokman幾乎冇影!隊長Lokman及Anson Kong奉命出嚟解說,隊長說:「因為一首歌要分畀12個人真係唔容易嘅,同埋大家嘅風格都唔同。至於歌詞係咪好露骨?每人get嘅意思都唔同,就會有好多唔同幻想。」而由頭帶到尾,做晒主角的姜濤唔敢插嘴,被追問才輕描淡寫說:「都係為咗效果,冇諗過邊個多,邊個少,而且排舞時間都好緊逼,大家冇咁嘅時間去多諗。(要唔要安慰吓隊友?)不嬲都唔會有呢個擔心,因為我哋出道兩年,一直都有呢啲問題,但係我哋都慣咗,唔覺得會傷害彼此感情。」

  Edan及Alton被花姐點名向記者解答誤會,前者面紅耳赤,耍手擰頭說:「冇冇冇難受!可能唱少啲,但跳舞會多返啲,而且有另一個Version,會相輔相成嘅。明白歌迷都係好擔心我哋,或者叫乜嘢心切?」AK搶答:「愛之深,責之切。」Edan愈講愈亂:「唔係呢個,算喇!唔好拋書包,佢哋好緊張我哋,原意都為我哋好,但唔使太擔心,因為會有另一個Version。」相對Alton輕鬆回應:「今次幾鍾意個MV,因為拍攝時花姐提我哋要開心啲!甚至推我出去,話要Alton嗰個樣呀,因為我個人好善良,就係好kind咁嘅樣囉!」

採訪:方騫平 攝影:譚壹致 形象:Felix Wong、Daniel Chu

服裝:Mastermind、MYND、D-MOP 場地:香港九龍貝爾特酒店

髮型:Lydia Yung、Denny Ku、Man@ Chic Private I Salon

化妝:Circle、Rainbow、Mayling @Annie G. Chan Centre

其他文章
hd