首頁 日報娛樂

連詩雅視為結婚人辦 黃翠如慶幸搵到超夾蕭正楠

03/07/2020
■翠如和Shiga因今次合作成為好姊妹,一直有保持聯絡。
■翠如和Shiga因今次合作成為好姊妹,一直有保持聯絡。 (1/5)

  黃翠如和連詩雅(Shiga)首度合作劇集《那些我愛過的人》,劇中分別飾演姊妹「方樂汶」和「方書文」,令本身是獨女的Shiga終感受有家姐滋味,而翠如亦似多了個妹妹,由於兩人太投入,拍嗌交戲會勁心痛。講到婚姻,翠如自覺幸運搵到超夾老公蕭正楠,而最近跟陳家樂傳緋聞的Shiga,就好羡慕他們婚後仍如拍拖甜蜜,更視為結婚人辦,不過她坦言未準備好做人妻。

  翠如和Shiga劇中有不少嗌交戲,兩人好易投入,而拍時或者拍完都會嗱住嗱住好心痛,因兩人用的是真感情。翠如說:「佢係個好放手嘅演員,可能因為佢拍劇經驗比較少,咁我作為家姐,我哋一齊經歷嘅嘢,佢好自然放心畀我帶住,所以只要我真心交戲畀佢,佢一定會好真心佢畀番我,我好開心有個以咁放手嘅對手,觀眾應該會感受我哋之間嘅姊妹關係好真實。」

  拍攝時已升呢做人妻的翠如,角色令她重新審視跟蕭正楠(Edwin)關係,慶幸遇到個超夾老公,「我好好彩,我同Edwin價值觀,性格同好多諗法太似啦!(睇你哋ig好似睇緊一個人咁)佢抄我啫!(連:幽默都好似)幽默感係我學佢嘅!(連:反而呀!)係呀,我哋兩個相對哋佢係陽光嗰派,佢積極樂觀過我好多,呢方面我受佢影響得好厲害,所以大家互相同步一齊行,好慶幸大家好似,我哋步伐好似。」

  Shiga看到翠如的幸福,羡慕之餘亦大講揀老公要求,「我成日聽到好多人因為習慣而結婚,或者已經覺得係理所當然,但係我每一次聽佢哋(翠如和Edwin)講佢哋嘅愛情呢,感受到佢哋仲係好愛,佢哋sweet係從心底,所以我識咗佢哋覺得婚姻仲更加難囉!呢啲嘢可能你哋唔覺,但係旁觀者聽你哋講對方嘅時候,有啲嘢遮唔到同扮唔到,心底裏鍾意對方,所以真係好難得有個咁嘅對象,你哋標準太高啦!所以三觀相似好重要。」不過Shiga強調仲未準備好做人妻。

撰文:杜淑霞 攝影:李維隆

服裝:Talulah、Runway Workshop(黃翠如)、Runwayworkshop(連詩雅)

其他文章
hd