首頁 日報娛樂

超貼地 黐實郭晶晶買外賣逛超市 百億霍啟剛 原來係暖男

03/07/2020
落街覓食
■Kenneth陪太太到屋企附近一間中餐廳買外賣。
落街覓食 ■Kenneth陪太太到屋企附近一間中餐廳買外賣。(1/11)

        已故富豪霍英東的長孫、霍英東集團副總裁及全國政協委員的霍啟剛(Kenneth),雖然身家逾百億,但一向出名低調,跟太太郭晶晶不論食嘅、用嘅都好樸素,一直教仔女學懂珍惜,所以Family day都要求小朋友洗車賺零用錢,仲去農村學插秧體驗生活,等子女明白咩叫粒粒皆辛苦,難怪兩人被外界譽為「豪門清泉」!上周四(25日),愛錫老婆的Kenneth陪郭晶晶到寓所附近買外賣,之後仲做「跟得老公」陪逛超市,原來霍生係暖男嚟嘅。

近月霍啟剛喺社交平台好活躍,除了頻頻Po家庭照及工作側拍外,本月初仲開始拍片做KOL,早前他就同網民大玩「你問我答」,並大方分享夫妻相處之道。提到剛「大步檻過」7年之癢,今年11月便踏入結婚8周年,已有3個仔女的Kenneth坦言有了小朋友後,兩公婆焦點必定會落在子女身上,但為了保持婚姻新鮮感, 他一星期至少會約太太郭晶晶出街睇一次戲,二人間中也會去個短Trip,享受二人世界。事實上,私下Kenneth都好黐老婆,一得閒就會同郭晶晶送細路返學,又會陪對方出埠開工,非常恩愛!

幫襯平民餐廳

剛過去的端午節,Kenneth一家五口就搭纜車到山頂睇風景,玩咗大半日3個小豆丁都攰晒,於是兩公婆就先送仔女返淺水灣大宅,安頓好後,再於下午4時許到寓所附近買外賣。一身街坊裝、戴上口罩的二人拎住個紅色「吉祥如意」環保袋,入咗去一間平民中餐廳買粥粉麵飯,人均消費都唔使100蚊,非常Down to earth。雖然間舖距離屋企都係2分鐘路程,但Kenneth都堅持陪郭晶晶去揀餸,真係好鬼冤氣;睇完餐牌點好菜後,郭晶晶就企出門口等老公畀錢,Kenneth望望手錶見仲有時間剩,便尾隨太太到隔籬行超市。

陪睇家庭用品

        Kenneth陪住太太乜都睇吓,睇完餅乾又睇汽水,兩人還駐足研究清潔用品,前者喺Family time都冇撳電話,全程投入做「跟得老公」,傍實郭晶晶又畀吓意見,睇得出Kenneth都享受呢種平凡夫妻生活。最終兩人都係齋睇冇幫襯,以為霍氏伉儷會折返拎外賣,殊不知二人竟直接返屋企;上到樓後,郭晶晶就同媽咪一齊挨喺窗邊一路傾偈一路望住對面街,心情相當唔錯。大約半個鐘後,其家傭就落樓幫手拎大袋外賣回家,終於可以開餐。

採訪:張詠森

其他文章
hd