首頁 日報娛樂

合作《地產仔》預冇老友做 吳肇軒胡子彤靠 「兄弟打」 消氣

07/07/2020
■軒仔(右)和子彤(左)感情好到每日都見,仲會不時鬧交,但笑言牀頭打交打尾和。
■軒仔(右)和子彤(左)感情好到每日都見,仲會不時鬧交,但笑言牀頭打交打尾和。 (1/6)

  吳肇軒和胡子彤最近首次拍住擔正ViuTV新劇《地產仔》,雖然兩人認識多時,但初次有大量對手戲,他們坦承預了拍完該劇可能更老友或者冇兄弟做,好彩合作後無論在公在私都更了解對方。不過,兩人自爆期間不時意見不合,有次更搞到差點反面收唔到科。完成該劇後,兩人創出「兄弟打」,讓對方任打消氣,令兄弟間冇隔夜仇。採訪:杜淑霞 服裝:Sandro(吳肇軒)、O.N.S(胡子彤)

  軒仔和子彤由於同經理人公司,平日有好多其他合作機會,但合作一套20集劇集,對足4個月,絕對是第一次,兩人事前有晒心理準備可能出事,軒仔說:「我哋拍拍吓都預咗一係會更加friend,一係會冇兄弟做。」子彤解釋,「因為大家做嘢都會有唔同意見,難免有拗撬。」

  原來,軒仔和子彤不但經常意見分歧,仲搞到差點反面,軒仔說:「我哋成日話我哋係演員唔係明星,嗰日拍攝有啲Over咗,我要一次過就幾部機,佢看在眼裏就以為我講一套做一套,到佢拍我就提佢要就個位唔係用唔到。」子彤再說:「我嗰時語氣忟咗,答佢『黐線,我淨係為個戲好咋喎!』佢聽完行咗去,我就知賴嘢,好彩嗰晚傾番,其實佢拍劇經驗多過我,佢係知趕所以咁做。」完劇後,兩人創出「兄弟打」來維持關係,子軒說:「我哋只要叫『兄弟打』,對方就要任佢打消氣,咁樣兄弟就冇隔夜仇。」

為逝世媽咪努力工作

  該劇開拍前半個月,軒仔媽咪因癌病過身,子彤都讚他相當專業,完全冇影響工作,「不過佢收工就玩到好癲好反常,我咪叫佢坐低吓傾吓,但講兩、三句佢就喊,知佢要靠玩減壓就由得佢。」軒仔謂媽咪是他頭號粉絲,所以會做好工作,「我第一套戲,佢帶朋友去睇咗七、八次,我有報道佢仲快過經理人轉發畀我,佢好支持我演藝工作,所以我會努力工作唔會令佢失望。」

其他文章
hd