首頁 日報娛樂

拍《殺手》傷痕纍纍 龔嘉欣唔諗結婚向視后進發

24/07/2020
■龔嘉欣拍《殺手》付出好多,但佢冇諗過要有乜回報,只求盡力演出。
■龔嘉欣拍《殺手》付出好多,但佢冇諗過要有乜回報,只求盡力演出。 (1/7)

  龔嘉欣喺新劇《殺手》中飾演癲喪嘅Dark Angel,同黎耀祥打戲連場,拳拳到肉,表現獲讚,打到傷痕纍纍的嘉欣,至今右手指尾仍然留有後遺症,因為韌帶曾撕裂而搞到變形。嘉欣強調從來冇埋怨:「我係一個捱得苦嘅女仔,OK啦,都係值得嘅,因為要盡力做好件事。」

採訪:方騫平 化妝:Henry Li 髮型:Sue Cheung 服裝:kate spade 飾物:Atelier Swarovski 鞋:Rene Caovilla

  龔嘉欣為拍新劇《殺手》犧牲好大,頭髮要剷青,又要性感Look喪打,更要被黎耀祥摸胸,好彩劇集出街後反應好好,都算冇白費心機:「朋友以為我打得好流,睇完就勁讚,話冇諗過我做到替身同武指嘅效果,鏡頭前播嗰幾分鐘動作鏡頭,其實拍咗成日,每日同祥哥(黎耀祥)開工前都會歎一口氣,唔知今日點算好!」歎完氣之後呢?嘉欣笑言,「歎完氣咪硬住頭皮埋位囉,不過出嚟有咁好效果都係值嘅,就算留有少少傷疤,我都唔係好在意。如果下次開Part2再做打女,我一定拉埋祥哥落水,哈!佢係我戲內戲外嘅好拍檔嘛!」

玩人哋個B一樣開心

  除咗打鬥要求嚴格外,龔嘉欣試過做唔到一個表情而眼濕濕:「我要澄清,監製陳維冠冇鬧過我,相反好鼓勵我哋,只係我忟自己啫!」戲中Dark Angel好重感情,會為所愛而爭取,現實中的嘉欣坦言感情隨緣,唔會諗太多嘢:「幾時結婚生仔控制唔到,但喺事業上,可以好清晰咁定下目標,o依家我30歲,希望可以再探索多啲嘢,當然,4年前拎過女配,下個目標係視后。o依家未係時候結婚生B,惟有做住保母先,玩吓人哋個B一樣好開心。」

其他文章
hd