首頁 日報娛樂

拍警匪電影被網民「問候」 喬寶寶冒險返港 只求搵啖食

29/07/2020
輕鬆煞科
■寶寶等咗一日至夜晚11點,先埋位拍攝指揮下屬林偉部署任務嘅戲。
輕鬆煞科 ■寶寶等咗一日至夜晚11點,先埋位拍攝指揮下屬林偉部署任務嘅戲。(1/9)

  返蘇格蘭同家人團聚,享受5個半月退休生活的喬寶寶,兩周前低調返港隔離,原來佢接拍咗新戲《時代》。近日香港疫情持續嚴峻,連續多日錄得百幾宗確診個案,喬寶寶唔太擔心,因為要搵食冇辦法,但他承認今次返港都幾無奈,因為所拍電影帶有「顏色」,「無啦啦俾人私訊『問候』,坐地鐵出入,乘客見我係南亞裔人即刻彈開,怕我會帶病毒!」好彩TVB見他回港主動搵佢拍劇,寶寶話總算有額外花紅。採訪:方騫平

  本周日,喬寶寶喺西貢蠔涌村村公所拍煞科外景戲,劇情講飾演警務處助理處長嘅寶寶指揮下屬部署任務,原先導演想加一場戲,安排39歲的黃榕為他急救包紮傷口,但因超時而取消。寶寶笑說:「我有老花,冇戴眼鏡睇唔清楚黃榕,聽講佢上圍數字幾吸引!」戲內黃榕要着住醫護急救制服被逼「封胸」,問黃榕怕唔怕疫情?她強調自己常做運動,免疫力較好。

我愛香港冇政見立場

  今次冒險回港拍戲,寶寶強調完全為咗搵食:「喺疫情下仲有工開好難得,雖然收番8年前片酬,但老闆好有心,包埋機票同住宿,既然喺蘇格蘭無所事事,印度餐館只係做外賣唔使咁多人手,咪返嚟搵食囉。」據《香港中國通訊社》透露,電影講述新聞報道員與香港警察攜手合作,揭發一連串社會暴力行為與外部勢力干預有莫大關係。對於所接拍嘅電影被不少網民「高度關注」,寶寶坦言接拍前只知道是一部警匪片,「話有個警官角色需要一位外籍人士,至於內容及合作演員就唔太清楚,接咗之後就俾網民留言狂鬧,甚至爆粗『問候』,真係好無奈,我又唔係劉德華、周潤發,冇得揀角色,只係做返演員本份。」寶寶愈講愈灰,「我冇政見立場,每個香港人都係我朋友,我好愛香港,當日香港疫情第一波,我專程由印度運口罩返香港派畀弱勢社群。有時做人都幾艱難,正如當日拍《機動部隊2019》,都有舊同事不滿我拍戲唱衰紀律部隊。」

做好防疫拍戲唔使怕

  喺疫情下拍戲,寶寶話會更加小心同注意個人衞生,「之前喺沙田隆亨邨入面嘅餐廳取景,因為條邨有多宗確診個案,劇組都嗱嗱聲轉場去大圍拍,呢方面導演安排得好好,大堆頭場面都盡量搵外景,咁樣有空間去保持距離。」寶寶又說九成香港人都有戴口罩,情況比外國好,只要豁免強制檢疫方面把關得好啲,控制情況應有改善。「不過,因為我係南亞裔人,戴住口罩坐港鐵都會被歧視,最初我唔知,以為坐錯咗去關愛座,點解左右兩邊都冇人嘅!」

  另外,因為唔夠Job做,去年已離開TVB嘅喬寶寶獲邀再回巢,為一套合拍劇其中一個單元演出,突然變得有「市場」,寶寶笑說:「所有工作我都無任歡迎,但我答應陪細仔過生日,所以一定要9月前離港。」

其他文章
hd