首頁 日報娛樂

網上平台分享親子食譜 陳倩揚同仔女下廚增感情

11/09/2020
■倩揚當日一次過拍攝示範三餸一甜品親子食譜,包括手上的「日式咖喱漢堡扒」,熟練的她一個下午便搞掂。
■倩揚當日一次過拍攝示範三餸一甜品親子食譜,包括手上的「日式咖喱漢堡扒」,熟練的她一個下午便搞掂。 (1/6)

  陳倩揚出名煮得,最近獲網上烹飪平台邀請主持《Towngas Cooking煤氣教煑》分享及示範親子食譜。雖然倩揚為節目要準備三款菜式及一個甜品,但她直言零難度,因為本身有兩仔一女的她,已經訓練有素,加上疫情關係近期一日三餐都要親自準備,一定要學識簡單又多變化的菜式,才可以應付。不過她亦好享受這段日子跟小朋友一齊下廚,增進不少感情。  採訪:杜淑霞  場地:煤氣烹飪中心

  倩揚獲邀主持時,完全不擔心要分享的食譜,「我真係覺得零難度,我一分鐘就想好啦!因為呢個係我每日嘅工作,雖然有家傭姐姐幫手,但係我會諗好晒,所以腦裏面隨時都想到食譜出嚟,對我真係好簡單。」她又解釋當中竅門 ,「譬如日式咖喱,裏面可以配唔同嘅肉或者蔬菜,配搭唔同成個感覺都有好大分別,少少變化已經係另一個餸。」

  倩揚坦承疫情期間,三餐都留在家食確實壓力不少,「因為哥哥(9歲長子)本來係返全日,細佬(5歲次子)就返半日,o依家三餐都喺屋企食,所以真係要諗多啲變化去應付。」不過,她有秘訣令小朋友食得更開心,「可以嘅話我會同佢哋一齊整,佢哋有份參與會特別開胃,就算妹妹o依家得兩歲咁細,我都會畀佢幫手做啲簡單嘢,雖然有啲家長擔心整污糟啲地方,但地方可以再執返,同埋呢個係好好嘅親子機會,我會教佢哋認識吓食材同煮嘢食過程,不知玩得幾開心,一晚時間好快過。」

  疫情下倩揚要一帶三,雖然有家傭姐姐幫手,但她仍要主持港台節目《精靈一點》,所以分配時間方面要做得好,「好彩三個小朋友都算幾乖,特別係大仔就算唔使返學校,只係網上上堂,佢都會自己寫晒時間表。不過最搞笑,呢段日子二仔黐住大仔感情更加好,兩個乜都一齊,就連去小便都要約埋去,真係好可愛,所以呢段日子雖然有辛苦地方,但係一家人感情仲好。」

其他文章
hd