首頁 日報娛樂

酒店慶祝結婚三周年 鄧達智分享「夫妻」相處之道

18/09/2020
■鄧達智及陳梓欣喺酒店慶祝結婚三周年,房間佈置好浪漫。
■鄧達智及陳梓欣喺酒店慶祝結婚三周年,房間佈置好浪漫。 (1/6)

  愈嚟愈多已婚男藝人被揭偷食,經營一段婚姻唔容易,尤其同性婚姻就更難。9月9日係時裝設計師鄧達智(William)與醫生伴侶陳梓欣(Clement)的結婚三周年,因為疫情未能出國,兩人改於酒店staycation慶祝,曾確診新冠肺炎並已康復的鄧達智讚好陳醫生令佢好有安全感,「我哋行到今時今日,好難得!」

採訪:方騫平 場地:Marco Polo Hotel



  當日酒店職員好識做咁幫兩人悉心佈置房間,一室紅白氣球加玫瑰花瓣,仲有大大個英文字LOVE營造浪漫氣氛。生於大家族的鄧達智坦承,至今仍然有鄉親畀眼神佢睇,對他唔瞅唔睬,甚至兜路行迴避他:「情況好似我新冠肺炎康復後一樣,上周我同屋企人去飲茶,對面枱嘅人一直用唔友善目光眼望望,最後叫侍應過嚟要求我哋調位,陳醫生好明事理,話咁樣係人之常情,因為社會好多人唔太了解個病,所以情有可原。」William形容自己跑過碼頭,見過世界,有唔少人生經歷,根本冇有怕!

  結咗婚3年,鄧達智和陳梓欣因了解而愈嚟愈愛,William分享經驗之談:「友誼係夫妻及情侶間重要元素,要用另一個角度去欣賞愛嘅人,一段成功嘅婚姻係要隻眼開,隻眼閉嚟包容對方,好似陳醫生會容忍我嘅小脾氣同埋論盡;而佢間中都會講嘢冇尾音,語氣重咗啲。雖然疫情下要喺屋企日對夜對,但我寫書;佢進修,我哋反而冇乜摩擦。佢最吸引我嘅地方,係用事業作為理想,陳醫生打算兩年後做無國界醫生,而我就跟佢過去,順便嚟個深度旅行,人生苦短,要將旅行變成生活一部份。」至於陳醫生就大讚William好有大佬風範,會照顧晒身邊朋友,而且好尊重長輩。

其他文章
hd