首頁 日報娛樂

捲入版權費風波 薛嘉麟同囝囝商場跳舞 諸葛紫岐繼續掃名牌做貴婦

24/09/2020
名店掃貨
■Marie有老公陪Shopping又掃走兩大袋名牌,所以笑得好開心。
名店掃貨 ■Marie有老公陪Shopping又掃走兩大袋名牌,所以笑得好開心。 (1/12)

        Neway太子爺薛嘉麟(Ernie)近日捲入版權費風波,但無損Ernie與愛妻諸葛紫岐(Marie)的心情,早前兩公婆3度被《頭條日報》發現到銅鑼灣行名店,其中一日仲帶埋大仔Arthur出街,兩父子玩到跳晒舞咁好開心,另一日Marie就去了LV買手袋、DIY飾品,貴婦生活如常,有仔陪又買到心頭好,咩煩惱都冇晒啦!

Neway太子爺薛嘉麟旗下的星娛樂(環宇)有限公司傳出版權費問題,但似乎都冇影響到薛氏夫婦心情,近月仲頻頻孖住落銅鑼灣Shopping,買名牌買護膚品,Marie仲好好笑容O添。

囝囝任舞

  好似早前趁Happy Friday一家三口就現身希慎廣場,當日傍晚6時許,諸葛紫岐孭住約8萬港元的Hermès手袋仔,獨自走到貴婦護膚品牌專櫃,快速擸走1,200蚊一盒共6片的逆齡眼膜;而同一時間,站在一旁等媽咪的6歲大仔Arthur就圍住爹哋氹氹轉,一身「蠟筆小新Look」的他先攬實Ernie施嗲功,成功冧暈爸爸任佢舞,兩父子還在大庭廣眾玩拍手仔,又拖實轉圈兼齊齊彎腰「做體操」,見寶貝仔笑到卡卡聲,薛公子都露出瞇眼燦笑!

玩到天黑

  另一個周末,換上一身名牌「牛仔Look」的Marie,又撇低囝囝同老公到利園一期LV慢慢逛,其間佢仲好有雅興地動手製作小飾品,當愛妻拎住個鉗,逐朵花黐上一個貌似鏡盒的物體時,Ernie就好有耐性地坐在沙發撳手機,不過唔知係咪太焗,佢忽然除低口罩,咁樣好危險㗎喎!足足同兩個Staff玩咗1個鐘,Marie終於捨得企起身畀錢走人,Ernie繼續篤住電話行去櫃枱Join老婆,離開時女職員幫手抽兩大袋戰利品上車,滿載而歸的Marie心情自然特別靚,一見到記者仲即刻笑晒口打招呼。



採訪:梁志明

其他文章
hd