首頁 日報娛樂

曾患抑鬱 疫情期間有空鑽研佛學 Jeana唔排除會出家

12/10/2020
■Jeana坦承讚研佛學後,不會再執着,連睇新聞都輕鬆咗,「以前會問點解咁慘,o依家睇通晒,佢哋係因果嚟,冇辦法控制唔到。」
■Jeana坦承讚研佛學後,不會再執着,連睇新聞都輕鬆咗,「以前會問點解咁慘,o依家睇通晒,佢哋係因果嚟,冇辦法控制唔到。」(1/9)

        Jeana(何佩瑜)最近參與ViuTV劇《熟女強人》飾演香薰治療師「Money」, 周旋於吳浩康同楊天宇中間,突然發現搞出人命,要為BB搵親生老竇。現實中,31歲的Jeana坦言好恨有小朋友,就算收養都冇問題,但18年跟導演翁子光分手後一直單身的她,反而唔急於搵新對象。5年前曾有過抑鬱日子的Jeana,仲自爆疫情下有更多時間鑽研佛學,深信因果關係,對愛情只會隨緣不會強求,採取佛系搵男友態度的她,更不排除將來有朝一日會出家。撰文:杜淑霞 攝影:譚壹致 髮型:Kim ng

化妝:Milk Cheng 服裝:@phaseeight 場地:中環迷你酒店

        在《熟》劇中,為腹中塊肉搵生父搞出連串笑話的 Jeana,私底下竟然恨有BB,「以前都會有啲焦急嘅,以前梗係想35歲前結婚啦!但係o依家真係隨緣,結唔結婚都好,小朋友我係想有㗎!因為我好鍾意小朋友,同埋我身邊真係太多人生咗小朋友,o依家31歲發覺自己啲母愛好氾濫。」Jeana仲唔介意收養,「將來真係過晒生BB嘅年紀,我都會收養小朋友,都係一個緣份,或者我本身有小朋友,但遇到有緣份嘅小朋友都會收養。」

  Jeana跟導演翁子光分手後,一直未有公開新戀情,原來曾有新對象出現,「我心目中都有個好鍾意嘅,但係點都有啲波折嘅,唔緊要啦!順其自然。」問她係咪好難追?「唔使點追我,有feel我就會上。(倒追人?)如果好鍾意囉!頭先提嗰個係好鍾意嘅,大家因為誤會就停咗,係有啲曲折,唔係一條直路,就隨緣!(係咪圈中人?)我哋轉話題囉!哈哈!」她又坦承自己情路曲折過劇集情節,「我啲感情係幾曲折㗎!可能我上一世欠人太多,咁樣諗咪通晒囉!唔會有怨恨。明白所有嘢都有佢嘅緣份,都係有原因而去認識、一齊或者分開,Mr Right出現都係有原因嘅,所以順其自然就得,唔需要急。」

信佛又食素

   現在變成佛系搵男友,只因Jeana拍完《熟女》後,因疫情好多工作延期,令她開始有空閒時間鑽研佛學,「6月完咗呢個劇冇得開工,當所有娛樂工作乜都冇嘅時候,日日好充裕時間喺屋企,發覺個人諗嘢諗多咗,會諗一啲平時生活以外嘅嘢,以前冇時間個腦冇得停一停諗一諗,沉澱一下,o依家有宗教信仰,仲開始食素。我本身成家人都係信佛,但係因為呢個疫情多咗時間去諗,媽咪都會輔導吓,多咗時間了解,我呢幾個月等如我30幾年嘅精神,我覺得30幾年好似白過咁。」她更不排除有出家的一日,「暫時未,但係我唔肯定,或者20年後、30年後會。」

  Jeana又自爆曾經有過抑鬱日子,雖然冇睇精神科醫生,但自覺好唔掂,「5年前有段日子,o依家諗番係有啲抑鬱嘅,成日喊,無端端會嘔,喺屋企唔出街。嗰時覺得好迷失,唔知為乜,或者冇路行,睇唔到條路。可能諗唔開,維持咗兩三年,我啲朋友都知,約我10次有9次都唔會出嚟。」她信佛後一切已想通,「當呢刻我哋好唔開心,有好多情緒,有好多諗唔通嘅嘢,好辛苦,因為我哋執着,但係其實個天安排咗,你只要向前行,o依家嘅我諗番轉頭就過咗,只係一點回憶,你當刻付出咁多情緒咪嘥晒囉!每個當下發生嘅嘢,真係唔需要太執着。」

其他文章
hd