首頁 日報娛樂

陳蕊蕊探靈爆喊要腰斬節目 KB李健宏做人正氣唔怕鬼

19/11/2020
■KB同蕊蕊喺猛鬼傳說嘅瀑布灣招魂。
■KB同蕊蕊喺猛鬼傳說嘅瀑布灣招魂。 (1/7)

  十年前憑YouTube大整蠱節目《玩爆你個腎》而爆紅的李健宏(KB),由鼓手踩入幕前,最近搞埋壞人製作中心,殺出一條新血路。KB喺疫情下冇畀自己停,繼續製作網上探靈節目《又要睇又要驚》,日前KB帶埋嘉賓陳蕊蕊去咗瀑布灣探靈,KB親自落水超度亡魂。採訪:方騫平

  網上探靈節目《又要睇又要驚》兩年前拍第一集,當時只係喺萬聖節去山頂荒廢屋取景,點知就一直玩落去。日前大隊去咗日治時期「亂葬崗」瀑布灣探靈,KB話呢度發生過多宗離奇意外,甚至有富家女放狗墮崖,所以有唔少靈異傳說。當晚因為打風,天氣唔係好穩定更添迷幻,原先想過去當年日佔時期用嚟做軍事瞭望台嘅廢置石屋,因水漲都去唔到,大隊唯有留番喺石灘拍攝。

  師傅先為KB同蕊蕊點起香蠋,播住日文鬼歌《籠中鳥》做招魂儀式,跟住兩人一邊燒衣紙,一邊透過磁場探測機跟靈界「溝通」,探測機隱約傳來講英文、講廣東話,成人及小朋友對話,嚇到蕊蕊唔敢向後望,猛話對唔住打攪晒,而KB就淡定得多,繼續對住探測機發問問題。之後師傅掟完西瓜落水後,便用紅繩綁住KB腰間落水做翻盆儀式超度亡魂,蕊蕊則在岸邊打鼓。當晚頭重重嘅蕊蕊心慌慌:「其實我一直都唔做靈異節目,唔知點解上兩星期竟然答應KB拍,嗰次去咗一間荒廢咗嘅老人院,喺招魂儀式後Feel到個頭劇痛,爆喊話唔想再拍落去。」KB形容蕊蕊好渣:「佢喊到崩潰,第一次有嘉賓咁激動要腰斬個節目,其實我好正氣,又冇害過人就唔使擔心,我覺得鬼唔恐怖,人先至最恐怖。」

其他文章
hd