首頁 日報娛樂

鄭啟泰擔演男主角 瑪姬拍MV笑到標眼水

25/11/2020
■瑪姬感謝鄭啟泰獲邀演出即時答應。
■瑪姬感謝鄭啟泰獲邀演出即時答應。 (1/6)

  瑪姬近年主力發展司儀和主持事業,疫情期間大型活動大幅減少,卻讓她有更多時間參與音樂製作業務,在不同社交平台舉行網上音樂會外,更自資翻唱自己欣賞的廣東歌及自組班底製作MV,近日翻唱陳奕迅(Eason)舊作《我有我愛你》,並邀得好友鄭啟泰擔任MV男主角!

  瑪姬繼年初選唱Gin Lee的《很堅強》和周柏豪的《傳聞》後,近日翻唱陳奕迅(Eason)02年作品《我有我愛你》,更邀請前電台DJ同事兼好友鄭啟泰(Eric)擔演MV的男主角,瑪姬道:「《我》係Eason金曲中最有玩味嘅Sidetrack,Jazzy得嚟又有啲調皮,有好大發揮空間。今次嘅MV走搞笑路線,不論服飾同化妝都刻意帶出復古嘅感覺!」

  瑪姬感激鄭啟泰當日獲邀即答應仗義幫忙,「司儀工作我哋合作過好多次,演對手戲就係第一次!我仲要麻煩佢去度身訂造恤衫,拍攝當日又要佢出動私伙色士風,MV入面有啲情節仲要求佢刻意醜化自己,呢個朋友真係唔話得!」

拍攝期間笑料百出

  拍攝MV期間笑料百出,瑪姬多次笑到標眼水,不時要化妝師為她補妝,「我構思嘅劇情講述,我心花怒放咁出席同Eric嘅約會,一入餐廳門口,就見到佢好有型咁吹住色士風由樓梯行落嚟冧我。坐低之後,我先發現佢好奇怪,撩鼻、䟴腳、亂掉餐巾、流汗流到成個胳肋底濕晒。最後佢拎鑽戒求婚,我都係搶住應承,呼應番《我》嘅主題。」

  問到為何選唱Eason的歌曲?瑪姬表示今年7月為Eason於紅館舉行的網上慈善音樂會記招擔任司儀,近距離被Eason對音樂的熱誠和對業界的貢獻感動,所以當時在台上已決定要翻唱他的作品,瑪姬亦期望能在明年再次擁有屬於自己的作品!

其他文章
hd