首頁 日報娛樂

相隔20年返娘家拍劇 關寶慧幸積穀防饑捱過疫情

25/11/2020
■54歲的寶慧認為要無時無刻裝備好自己,所以長期keep住減肥。
■54歲的寶慧認為要無時無刻裝備好自己,所以長期keep住減肥。 (1/7)

  關寶慧最近相隔20年再參與TVB劇《使徒行者3》,飾演警務處助理處長「Madam Chan」,她坦言既新鮮又好玩,同一班演員合作愉快望有機會可以再多拍劇集。去年成為舞台劇后的她,因疫情令工作計劃慘被打亂,幸好早已學識積穀防饑,經濟未受影響,仲趁這段時間努力裝備好自己。

採訪:杜淑霞 髮型:Zanki by I hair. Nail 服裝:Mountain Yam

  不經不覺,寶慧對上一套參演的TVB劇已是2000年的《無頭東宮》,所以對於重返娘家感覺相當新鮮,「今次除咗江美儀喺電影合作過外,全部對手都冇合作過,錄影廠都係第一次去開工,係好有新鮮感,但一埋位以前嘅感覺就返晒嚟。」她又大讚一班新拍檔相當專業,「佢哋真係好優秀,記好晒對白先入廠,試過拍10場都係開會戲,我兩日前開始背,到揸車返工都喺度背緊,如果我記得咁辛苦,其他接嗰啲人唔記對白嘅話,我就真係瀨嘢㗎!」

逆境下轉危為機

  寶慧去年憑藉舞台劇《她媽的葬禮》奪得第28屆香港舞台劇獎的最佳女主角(喜劇/鬧劇),可惜遇上疫情令她表演工作停擺,「係有少少遺憾,冇計啦!全世界都係咁,不過真係好難講,如果畀我早幾年攞獎嘅,一樣唔知會係點啫!所以無論係逆境定疫情,邊個疫都好啦!永遠要準備好自己,所以我成日都減肥㗎!咁嘅年紀自己唔keep唔鍛煉好自己,好易走樣嘛!」不過寶慧反而覺得可以轉危為機,「我趁呢段時間寫吓劇本,呢個係疫情下希望完成嘅功課。」

  雖然工作買少見少,寶慧慶幸早已有穩定投資,疫情下經濟未受影響,「如果我之前唔係積穀防饑,我坐喺屋企就膝頭矯眼淚!入行前已識諗,如果我要好辛勤打幾份工嚟養家,根本唔會入行,呢行太冇安全感,三更窮五更富,要靠自己畀安全感自己,幾十年前已經同自己講花無百日紅,香港有幾多個張曼玉、鍾楚紅、梅艷芳同林青霞,你要預去唔到佢哋咁樣要咩玩法啦!」

其他文章
hd