首頁 日報娛樂

4歲囡囡合作畫畫做善事 劉倩婷正能量面對疫境

03/12/2020
■劉倩婷(Sandy)同4歲多女兒李仟辰一齊畫畫,陶冶性情之餘亦為慈善出一分力。
■劉倩婷(Sandy)同4歲多女兒李仟辰一齊畫畫,陶冶性情之餘亦為慈善出一分力。 (1/5)

  慧妍雅集一直都有舉辦不同的慈善活動,繼今年4月捐贈2萬個口罩為有需要人士雪中送炭後,今個月又有最新慈善活動《Dream Big》,約40名慧妍會員製作並捐出畫作,畫作會設計成不同的用品作義賣,為慧妍雅集籌募慈善經費,用以支持與慧妍雅集慈善主題「用愛閃耀明天」相關之慈善項目。09年港姐冠軍、前慧妍會長劉倩婷(Sandy)就同4歲多的囡囡李仟辰(Eldora)為活動合作畫畫,Sandy表示:「囡囡遺傳咗爸爸嘅藝術細胞,好鍾意畫畫,大約兩年前一識執筆就開始畫㗎嘞!」撰文:何蔓琪

  Sandy表示李丞責對傳統中國文化及藝術有研究,家中有唔少古董唐卡及字畫珍藏,令她對藝術文化的認識增進不少。知道囡囡喜歡畫畫會不時帶她參觀畫展:「其實阡辰嘅畫作經常喺藝術學校展示,早前亦有帶佢去朋友開設嘅畫廊參觀,囡囡亦好鍾意。今次囡囡Lead住我完成呢幅大閘蟹畫作,靈感係來自日常生活,佢知道媽咪鍾意食,畀我望梅止渴。」外界一直盛傳Sandy有喜,問到係咪因為懷有第二胎而要戒口?Sandy笑笑口冇否認:「要盡量少食啲囉!如果有好消息一定會通知大家!」

  Sandy指早前疫情稍為緩和時,老公李丞責都有同囡囡仟辰一齊去行山,為求安全都有全程戴好口罩。面對新一波疫情來襲,Sandy都唔敢鬆懈:「之前都仲有約朋友,幾個家庭一齊玩,而家真係唔敢見太多人嘞!連私人聚會都盡量避免。」她又感謝老公帶好多正能量畀屋企:「抗疫疲勞一定會有,但最重要係可以共渡呢個難關,老公亦會畀好多正能量屋企。呢段時間就趁機會多陪伴家人,大家感情亦增進唔少。」

  疫情經歷第四波,仟辰經常要留家上堂,「囡囡喺屋企嘅時間多咗,慶幸老公一直喺香港,可以兩個人分工,亦都有時間處理平時繁忙而未能處理嘅事情,盡量以正能量去面對,大家加油。」若疫情完結最想去邊度?以往一有時間就出國度假的Sandy指去邊都咁開心,最緊要一家人齊齊整整:「咩地方都想去,我哋鍾意瑞士、馬爾代夫、日本。」

其他文章
hd