首頁 日報娛樂

被二汶踢走 巴打罷睇《造星III》「翻版石原」Christine歌手夢未碎

04/12/2020
圓歌手夢
■27歲的Christine是太陽娛樂旗下藝人,她透露正跟公司洽談出歌事宜。
圓歌手夢 ■27歲的Christine是太陽娛樂旗下藝人,她透露正跟公司洽談出歌事宜。 (1/12)

        ViuTV選秀真人騷《全民造星III》正播得如火如荼,首輪分組對決於上周結束,深得男工作人員及巴打歡心、有「港版石原聰美」之稱的44吋長腿鄭嘉欣(Christine)被導師二汶Foul出局,惹來全城哀號,支持者在討論區表達不滿,聲言罷睇,甚至燒at17啲碟!事後Christine爆喊嗌不捨,她接受《頭條日報》記者訪問時表示絕不就此放棄歌手夢:「公司有同我傾,可能會出歌,而家都多咗好多廣告。」

《全民造星III》自開播以來掀起不少話題,上周40強揭盅後,好多網民都戥被Foul出局的參賽者唔抵,當中巴打們最不捨的是身高178cm的「港版石原聰美」鄭嘉欣!有粉絲在討論區留言稱嬲到「差啲掉爛部電視」,又揚言罷睇《造星III》,甚至傳有男工作人員衝入房向監製花姐(黃慧君)求情,對此Christine表示:「多謝網民戥我唔抵,但我覺得導師有自己嘅考量,留得低嘅隊員都一定有佢哋過人之處,希望佢哋加油,我都會加油!」

衰冇自信

  至於比賽中輸啲乜?模特兒出身的Christine坦認缺乏自信,以至未能展現出自己的獨特性。談到10多年後重拾跳舞,要短時間內趕上大家的進度,Christine亦倍感壓力而數度爆喊,幸得戰友們指導,「Alan、陳葦璇都係出道好耐嘅歌手,喺佢哋身上吸收到好多唔同嘅經驗,參加比賽最緊要挑戰同超越自己,去到呢個階段已經當自己贏咗,無論心態、技能都提升好多。」由細夢想當歌手的她又謂勢必踩入樂壇,「我一定唔會放棄,呢個夢想已經堅持咗好耐,完咗比賽反而先係啱啱開始。」

接受批評

  對於被恨批是「花瓶」,Christine坦言外界對靚的既定印象是「乜都唔識、唔使點做」,但自己好畀心機去洗脫這個印象,亦一直有跟老師學唱歌。不過,當問到揀樣靚身材正定跳唱了得?她還是搞笑稱:「樣靚身材正,因為唱歌跳舞可以靠後天!」所謂樹大招風,有人歡喜的同時亦有Haters,提到石原粉絲轟她有辱女神兼哨牙,Christine自問不似神級的石原,也不敢跟對方比較,「睇到評論都係鬧嘅,有少少唔開心,但做得公眾人物就一定有好多唔同聲音,我會接受,可能某啲角度有少少哨牙,希望大家快啲睇到我真人啦,真人好啲,哈哈。」

撰文:黎寶倫 攝影:張詠森

其他文章
hd