首頁 日報娛樂

停Job半年 借十幾萬玩《造星III》 陳葦璇公開搲撈還債

31/12/2020
■葦璇直言細個會為千五蚊參加歌唱比賽,可以買個名牌書包,但現在參加《造星III》表面上蝕住做,但覺得好值得。
■葦璇直言細個會為千五蚊參加歌唱比賽,可以買個名牌書包,但現在參加《造星III》表面上蝕住做,但覺得好值得。(1/11)

        熱爆的《全民造星III》上周六總決賽順利結束,一直被睇高一線冠軍在望的陳葦璇,最終只得亞軍,不過自言唔算有觀眾緣的她,覺得觀眾票選排行第三名 ,已經好滿意成績。其實葦璇15年參加選拔賽加入女團As One出道,到17年單飛,人氣遠遠唔夠參加《造星III》,ig的follower更由6萬4千激增至近10萬。不過葦璇賺到人氣,荷包反而乾塘,節目冇演出費外,她自爆忙比賽半年搞到零收入,仲要自資請dancer、訂造服裝同搵造型師等等,瓣瓣都係錢,好彩經理人公司墊支6位數,攞完獎仍要還負債的葦璇,唯有公開搲撈,已有幾個工作接洽中的她,更定下目標,「希望一個月還得晒啦!」

對於今次賽果,葦璇相當滿意,因自評觀眾緣不及其他參賽者,「今次因為有民選,民選我係第3嘛!我已經好滿意。我係冇信心(民選),因為我見Cloud(雲浩影)、Ben(趙祥誠)、ANSONBEAN(陳毅燊)佢哋全部都係大家好喜愛嘅性格,都係比較親和力,可能我一向形象比較cool。」其實葦璇的觀眾緣,靠《造星III》入屋程度已幫她儲埋唔少,ig的follower暴升3萬5千個,仲收到不少人DM她讚她唱跳好睇,當然最直接是畀fans認得,「好surprise,啱啱同經理人食飯,餐廳有個媽媽級嘅食客叫我『葦璇』,真係好幸福,原來o依家電視仲有咁多人鍾意睇!」

  葦璇比賽期間一直表演出色,但亦有部份負評出現,首先網友認為25歲的她表現老積,特別在總決賽演唱林憶蓮的《願》,更慘評似演出《流行經典50年》,身經百戰的她卻答得輕鬆,「我個樣係生成咁嘛!其實我細細個已經係咁嘅樣啦!哈哈!18歲已經畀人話似25歲。而我覺得好有幸唱到《願》咁經典嘅歌,同埋係搵咗Travis(參賽者)重新編曲。點解要揀首咁難嘅歌嚟唱,田為首歌意義等同於《全民造星III》『最尾一幕,還未閉幕,最濶的路在塵世遠方』就算呢個節目完咗,我哋仲有好遠嘅路要行。」不過她笑言有在打扮上下功夫減齡,譬如這天專登留了額前的蔭。

不介意被評腿粗

  至於葦璇因經常穿bodysuit表演而被網友狠批長期冇褲着,亦被指雙腳線條未夠吸引,她亦完全不介意,「我自己好鍾意歐美裝,好期待可以有一日可以有個紅館咁大嘅舞台可以承托到咁爆嘅裝,睇外國嘅歌手Lady Gaga、Beyoncé、Jennifer Lopez,甚至係蔡依林同(容)祖兒喺演唱會,10套有5套都係呢啲cut,我自己想試囉!今次有咁大嘅舞台,就做自己最鍾意做嘅嘢,o依家唔試唔知幾時可以做呢樣嘢!至於我條腿不嬲都係運動員腿嚟,如果大家有睇我以前啲片條腿仲粗,我對o依家條腿都幾滿意。我唔強求觀眾全部外形都鍾意,但係我覺得嗰套衫係好靚嘅。」

  不過原來這些演唱會級表演效果,比賽期間零收入的葦璇,自爆要向公司借錢6位數才能完成夢想,「盡量慳啲使囉!你睇吓我都自己煮嘢食,呢個比賽開頭唔係用好多(錢),係20強唱《Born This Way 》同埋決賽嗰晚《Get Right 》要請Dancer,主要都係人手上,styling都有用咗啲錢,戰衣都要幾千蚊!Alina(李靜蓮)話嗰件都要幾千(差不多一萬)嘩!佢真係有錢!(佢話用晒身家)問Stanley 攞,哈哈!」由於靠公司墊支,她坦承要努力接工作,「我嘅心願,終有一日會如願,就係搵多啲job。已經有幾個報緊價,廣告之類,大家可以再幫多啲,真係要靠你哋,我搞唔掂呀!我希望一個月還得晒!」不過問到如果這10多萬,當交學費又抵唔抵呢?葦璇好肯定話:「抵!同埋緣份呢樣嘢,係用錢買唔到!」

撰文:杜淑霞 攝影:譚壹致

髮型:Larry Ho @ Aveda IL COLPO

化妝:Melody Chiu 服裝:ba&sh

                 場地:Studiodanz

其他文章
hd