首頁 日報娛樂

網民熱捧 叱咤男金心情好 許廷鏗一支公 笑住掃禮物

07/01/2021
除罩吸精  
■買了一部香薰噴霧機,梗要配番支精油一Set送畀人,於是Alfred又除罩逐支聞。
除罩吸精 ■買了一部香薰噴霧機,梗要配番支精油一Set送畀人,於是Alfred又除罩逐支聞。(1/10)

        ViuTV選秀真人騷《全民造星III》掀起全城熱話,不單止參賽者獲得關注,還帶挈導師與評判人氣急升,當中30強評判許廷鏗(Alfred)更獲網民封為「最佳評判」,甚至獲推舉做《造星IV》導師。之後Alfred更挾住這股氣勢,首次榮膺「叱咤樂壇男歌手金獎」,紅到被「土耳其護旗手」Hack IG。日前Alfred單拖到又一城「行大運」,短短3小時Hea遊3間鋪,其間巧遇港台DJ李志剛,還被市民「野生捕獲」。採訪:譚壹致

        許廷鏗的IG前晚遭黑客入侵,換上「大波妹」頭像及貼上土耳其國旗照,EQ甚高的Alfred抵死Hashtag「點解要揀一張咁冇taste嘅相做profile」,引來一班網民爆笑兼幫拖,幸昨晨成功奪回帳戶,被Hack一事因禍得福,其IG仲一夜激增1000 Follower!唔只深得網民歡心,Alfred圈中人緣也甚廣。

笑笑口受訪

  日前下午4時許,Alfred去咗又一城行街,他先去LOG-ON兜咗個圈冇嘢啱就去另一間舖買卡,買完又再折返LOG-ON揀禮物。其間,Alfred睇中一部398元的香薰噴霧機,他彎腰攞起部機左望右望,又拉低口罩、逐支精油拎嚟聞,一支精油約150元,最終扑槌叫職員拎了一Set。睇睇吓嘢巧遇李志剛,對方仲無啦啦拎出一支咪,遞向Alfred進行即興採訪,他即時邊講邊笑到瞇晒眼,搞到路過的途人都紛紛回頭望一望。

係咁撞到人

  傾了幾句後兩人就分開,Alfred繼續掃了一盒特價210元的Pictionary Air和一部369元的直立自動旋轉串燒機,盛惠約1,000大元。不過畀完錢後並冇即刻取貨,直接殺去樓下I.T買衫,途中仲被一對情侶「野生捕獲」,親民的Alfred當然來者不拒,秒速答允與女粉絲合照。當回去拎戰利品時,Alfred又在鋪頭門外撞到陸永,兩人於路中央停低吹了幾句,臨Say Goodbye前還互相捏一捏手臂。之後,「好多時間」的Alfred在商場內漫無目的地遊蕩至晚上7點,才抽住3大袋戰利品行到商場外搭車走。

其他文章
hd