首頁 日報娛樂

「翻版Edison」視狄維莊遜為目標 Jeffrey操大隻練武做打仔

08/01/2021
■Jeffrey盼完成學業後投身歌壇或電影圈。
■Jeffrey盼完成學業後投身歌壇或電影圈。 (1/7)

  憑ViuTV真人騷《調教你男友》獲觀眾認識的22歲小鮮肉Jeffrey(魏浚笙),IG Follower由3萬升到7.5萬,更帶挈他接下不少廣告及活動Job,酬勞上升,但呢位「廿四孝男友」靦腆表示銀碼唔太清楚,錢銀全交女友看管。被網民封為「翻版陳冠希」的他又開口恨入歌壇及拍戲,嘗試多方位發展。撰文:黎寶倫 攝影:李維隆 服裝:@diesel 場地:partyland 鳴謝:Barry工作室

  由模特兒界轉戰幕前的Jeffrey近日再為ViuTV遊戲節目《膠戰》擔任主持,更不介意男神形象崩壞,於節目中用腳拗手瓜、夾襪、畫花面等,「我唔係好Care,因為唔想影響拍攝進度,所以豁出去玩。」曾演出電影《大師兄》的他對唱歌及演戲感興趣,仲恨拍大隻佬打鬥戲,由190磅大肥仔減到變型男的他自問捱得,「我自覺幾打得,打泰拳都幾有天份,中二、三嗰時學咗半年,之後要讀書就冇玩到,但我好鍾意郁嚟郁去。(騷肌?)而家未準備好,但我唔怕辛苦,以前減肥一個禮拜都做5、6日Gym。」並謂以偶像巨石狄維莊遜(Dwayne Johnson)為目標,練好武術做打仔。

讀埋書先入行

  Jeffrey好鍾意唱K但就謙稱唱功一般,仲搞笑自爆中一、二熱衷參與校內歌唱比賽的瘀事,「記得係唱周柏豪嘅《夠鐘》,臨唱歌前仲食咗Wasabi,跟住唱到走晒音,班同學笑到瞓晒地。(留陰影?)之後我再參加,冇食Wasabi都係走走哋音,發現本身係有問題,又唔算五音不全,只係高音開唔到聲,不過唱得K多而家進步咗。」可獲娛樂公司招手?就讀香港公開大學Last一年的他大賣關子:「少少,但家人好Concern我學業,一定要讀埋書先。」訪問當日,Jeffrey亦即場接受唱歌、演技大考驗,結果證實他絕非得個殼,欲知詳情請留意《頭條娛樂》facebook專頁。

其他文章
hd