首頁 日報娛樂

龍爭虎鬥 《造星》系囝囝湧入樂壇 《造星III》NY搭John Mark 泰倫斯 組男團爭食

13/01/2021
超額完成
■鍾諾言(NY)唔介意在總決賽排第十,形容今季係超額完成,問到下季會否再捲土重來?他唞大氣話應該唔會,因為真係太攰。
超額完成 ■鍾諾言(NY)唔介意在總決賽排第十,形容今季係超額完成,問到下季會否再捲土重來?他唞大氣話應該唔會,因為真係太攰。(1/14)

        因為《叱咤樂壇頒獎禮》引發嘅「姜濤效應」成為全城熱話,加上MIRROR唔止攞組合獎,隊友亦拎咗新人獎。《造星》收成期啱啱先開始,事關有一班同樣出身《造星》系列的參賽者亦會於今年相繼殺入樂壇搵食。除《造星II》的Mike及MC外,《造星III》得第十名,20歲的鍾諾言(NY)亦被娛樂公司安排跟《造星III》的林躍翰(John)、謝嘉浩(Mark)及泰倫斯(Terence)組成跳唱Group,惡鬥簽約環球的跳唱組合PIX3L,自己人打自己人,誓必掀起樂壇一場龍爭虎鬥。採訪:方騫平 攝影:張詠森

        出道僅兩年,21歲嘅姜濤於今屆《叱咤樂壇頒獎禮》奪得「我最喜愛的男歌手」及憑《蒙著嘴說愛你》同時勇奪「我最喜愛的歌曲大獎」,創下最年輕得獎者紀錄。其實,姜濤出道後吸引大量女Fans追隨,更願意投入大量金錢賣廣告追星,不少唱片公司老闆看在眼裏深信《造星》出身的年輕歌手有得做,故願意揼本力捧。

年尾新人獎爭崩頭

  踏入2021年,華納唱片率先宣布《造星II》亞軍「人氣王」張天賦(MC)加盟,環球唱片亦緊隨公布,《造星II》冠軍吳啟洋(Phoebus)與歐鎮灝(George)和葉振弘(Marco)以個性跳唱組合PIX3L形式出道。另外,《造星II》第8名,一向是歌唱比賽活躍分子兼經常攞獎的Mike(曾比特)亦簽約環球唱片,出道作《我不如》,由《造星II》導師Eric Kwok作曲和監製、林若寧填詞。而MIRROR成員呂爵安(Edan)及ERROR隊長「肥仔」梁業亦會單飛,預計年尾頒獎禮新人獎必定爭個你死我活。

屋邨仔視坤哥為目標

  NY參加兩次《造星》嚟了解自己,知道能力去到邊度:「其實跳舞跳得耐都好想有個平台試新嘢,所以喺20強時揀咗《摩天動物園》演出,點知喺鐵籠度爬住唱,力有不逮,失準惹嚟負評,最怕條片會跟足一世!呢件事令到我喺總綵排時失去信心,最後乜都唔理豁出去。」比賽後NY跟Mark及Terence以組合形式面試,而他跟John相識5年,公司順理成章安排同門四兄弟組跳舞組合進軍樂壇:「o依家四兄弟一齊向前行,可以加大力量,兄弟情比單飛賺錢更加珍貴。」

  NY坦言呢半年用咗五位數追夢,參賽日子身心都好攰,無非為將來鋪路:「晚晚搭的士返屋企,用錢買休息時間。家人好支持我,參賽期間舅父仲塞零用錢畀我,夠我坐的士,真係好窩心!」NY自爆係屋邨仔,同家人住緊井型公屋,目前生活只夠錢食「麵包」:「所以一定要努力,唔努力支持唔到自己,我目標同喺屋邨出身嘅坤哥(吳業坤)一樣住好啲,希望喺25歲前可以搬出去,不過,o依家做到自己鍾意做嘅嘢好開心,暫時仲有時間去任性。」

其他文章
hd