首頁 日報娛樂

35歲生日報喜陀B八個月 劉倩婷晒李丞責操刀大肚靚相

25/01/2021
■劉倩婷趁牛一公開大肚相宣佈懷孕8個月。
■劉倩婷趁牛一公開大肚相宣佈懷孕8個月。 (1/10)

  去年10月,本報已獨家報道著名堪輿學家李丞責博士如願以償,跟09年港姐冠軍劉倩婷(Sandy)追牛B成功,本報更曾拍攝到Sandy在李博士陪同下現身公開活動,穿平底鞋的李太明顯肚凸凸,目測已陀B五個月。昨日是李太的35歲生日,壽星靚媽趁機貼出大肚靚相公佈陀B八個月的喜訊,大肚相意境好高,相中的Sandy肥肚唔肥身,手腳纖幼,面仔仍然好尖,絕對係靚靚大肚婆。撰文︰廖思慧

  記者致電Sandy恭喜,靚靚大肚婆笑唔停,並開心分享再陀B及過生日的喜悅。因為交遊廣闊,好多朋友都跟Sandy慶祝生日,包括樂小姐、朱千雪、蘇永康太太Anita、汪詩詩、汪圓圓及關心妍等。「朱千雪好忙,但佢都抽時間同我去酒店食Lunch慶祝。」因為Sandy的4歲囡囡李仟辰(Eldora)同關心妍囡囡楊榮心(Jovia)係同學,所以一眾同學媽媽亦有約Sandy到其中一個同學屋企慶祝,「疫情關係好難得先可以聚一聚,啲家長都好有心機,用好多汽球佈置,好靚好開心。」雖然疫情影響唔可以大肆慶祝生日,但Sandy笑言收咗超過20個生日蛋糕。

開心淺嚐幾啖酒

  上周五,本報拍攝到李博士買花買酒同老婆慶生,當時李博士仲笑笑口話會親自下廚煮生日餐賀老婆。問到好口福的Sandy最終生日餐食咗乜?「都係啲養肚嘅食物,增加骨膠原,好似鮑魚、花膠同好多海鮮,我媽媽都有份食。」因為太開心,所以Sandy都有淺嚐幾啖靚酒。問到再陀B感覺?Sandy坦言較第一胎輕鬆,「舒服過第一胎,好享受呢次陀B過程,不過因為疫情都會緊張。」Sandy又笑言肚中BB係運動型,「係咁郁,好似喺入面做瑜伽咁。」而姐姐仟辰亦好期待BB出世,「佢好開心,未感受到佢有呷醋感覺,仲成日會錫我個肚,又會聽吓個肚入面啲水聲。」

  至於一直好恨再做爸爸的李博士心情?Sandy笑得更大聲,「佢求咗我好耐,終於成功,佢當然係好期待。」Sandy還指李博士攝影癮大發,不斷同佢影大肚相留念,「啲相佢盡咗力㗎嘞。」問到腹中BB性別?Sandy笑言未講得住,言談間笑聲滿載相當快樂。

其他文章
hd