首頁 日報娛樂

盼牛年戲院勿再停業 軒仔小龍莎莎Locker 求電影順利上映

11/02/2021
■吳肇軒、凌文龍、張蔓莎和林家熙認為鼠年是儲能量的一年,牛年望好好發揮。
■吳肇軒、凌文龍、張蔓莎和林家熙認為鼠年是儲能量的一年,牛年望好好發揮。(1/10)

        受疫情影響,鼠年娛樂圈亦成為重災區,電影業近乎停擺,吳肇軒、凌文龍、張蔓莎和林家熙(Locker)工作大受影響,唯有視空檔為充實機會。快將踏入牛年,他們首要希望初七重開的戲院勿再停業,已拍好電影順利上映。軒仔和小龍最想在藝術節合演音樂劇如期公演;而莎莎和Locker就會主動出擊發展網上平台。

軒仔認為鼠年發展尚可,最開心上月憑台灣電影《破處》在芝加哥獨立影展獲頒「Best Actor」獎,「係一個鼓勵嚟,同佢哋(劇組)相處得好好,無論《破處》有任何人有好成績,我都會好開心,好期待再同導演(林立書)合作。」踏入牛年他有意學新嘢,「首先做好每個角色,當然最好多啲機會,同埋想練一啲新嘅嘢,其實我唔鍾意表演唱歌,但我會想個身多幾把刀。」講到將與凌文龍在藝術節合演的音樂劇《日薪》(暫名),他當然希望做到,但未敢抱太大期望。

  小龍坦承鼠年經濟上慳啲頂得住,亦多了時間重新思考,「反而開心呢一年我去咗上老師陳淑儀嘅堂同埋做助教,可以溫故知新。我又開啲私人班,好開心教嘅過程會喺學生身上吸到嘢,呢一年對我嚟講係好多養份。」講到新年願望,小龍都是放在演出上,「我希望每套戲每個演出,真係可以將每套戲入面想講嘅嘢,或者自己創作對個戲、角色嘅睇法,可以畀觀眾有深刻體會,畀佢哋覺得我有份做嘅戲係好睇,佢哋有嘢諗,我就好滿足好開心。」

主動出擊網上平台

  Locker去年算幸運拍了《媽媽的神奇小子》等幾部電影,但因疫情仍未上映,「 我幾期待拍咗嘅電影可以上映,同埋希望今年多啲嘗試搞笑角色,老實講入行幾年仲未搵到自己個位,今年想試吓搞笑方面去盡啲。上年年尾搞咗個online channel『試當真』,反應都幾好,今年想再搞多啲project,做多啲綜藝。」Locker更視男主角為長期目標,而短期目標是角色有觀眾記得。

  莎莎坦承受疫情影響鼠年過得不容易,「都感恩或者慶幸keep住都有啲工作可以維生,亦有嘅嘗試,而下半年上咗好多戲劇堂,成個過程豐富咗自己。」新一年莎莎想嘗試向網上平台發展,「第一次嘗試阿修(游學修)個channel『試當真』好好玩,係好有趣嘅世界,當可能電影電視劇未開拍到嘅時候,可能自己會創作啲片,同埋《地產仔》宣傳時開Live都幾有趣,自己都會試吓。」

撰文:杜淑霞 攝影:譚壹致

髮型:Sam [email protected](吳肇軒+林家熙)、 Yan [email protected] Two Salon(凌文龍)、 [email protected](張蔓莎)

化妝:[email protected] Makeup Academy(吳肇軒+林家熙)、Findo [email protected] IMAGE(張蔓莎)

其他文章
hd