首頁 日報娛樂

出爐視帝視后捱夜覆賀電 王浩信蔡思貝牛年期待拍喜劇

16/02/2021
■出爐視帝浩信和視后思貝祝《頭條日報》讀者,身體健康!心想事成!
■出爐視帝浩信和視后思貝祝《頭條日報》讀者,身體健康!心想事成!(1/9)

  王浩信繼18年憑《踩過界》奪得視帝後,最近跟蔡思貝再憑《踩過界II》 成為出爐視帝視后,兩人得獎後除了忙捱通宵狂發訊息答謝身邊人外,亦不忘諗點樣令自己進步配得起個獎。鼠年奪獎大旺的他們,踏入牛年兩人目標明確,希望用更多好作品報答觀眾,不過兩人對演喜劇都特別期待,浩信恨大受歡迎的《反黑路人甲》能拍續集,而即將拍跟王祖藍等首度合作古裝喜劇的思貝,就希望跟祖藍偷師學做喜劇演員。

思貝坦承得獎後感覺一直未很踏實,更立即思考點樣對得住個獎,「當然攞完係開心,亦都覺得好榮幸,因為係一個肯定嚟㗎嘛!亦都係呢7年演藝路上比較大嘅里程碑,反而更加唔可以鬆懈,2021年帶住呢個名銜點樣過呢!?」而為了答謝一班7年來支持她的朋友和工作伙伴,思貝更捱足一晚通宵到翌日下午1點半,「我有諗過返屋企瞓咗先,但我知道我瞓咗覺起身個感覺冇咁濃烈,所以我真係返咗屋企坐低,靜靜地諗嘢加覆message,反而我睇住每個人個名,回顧返呢7年嚟輔助過我啲咩、幫過我啲咩,或者喺我生命裏面發揮過啲咩作用,我想諗番啲回憶出嚟同每個人講番我對佢嘅感受,多謝佢哋。」

  相隔3年再憑「盲俠」奪視帝的浩信,令他更清楚未來方向,「其實第一次攞好似思貝頭先咁講,諗住做咩!?都諗咗幾年,其實我想做咩啫?想做演員囉!就係咁簡單咋嘛!咪演好啲戲囉!今年再攞其實最開心係見到一班兄弟姐妹大家都有獎,大家一齊奮鬥咗呢幾年,《反黑》入面咁多個角色攞獎。」而他跟思貝一樣狂覆message而捱眼瞓,「我都有覆到好夜,我都好想多謝每一個send message畀我嘅朋友,仲要係全部係寫一篇嘢,所以趁住有濃烈感覺時多謝咗人哋先,觀眾喜愛同埋朋友支持呢啲唔係必然,都值得珍惜同多謝。」早前接受《頭條》訪問時,浩信已透露對《反黑》有少少偏心,想不到他認為奪獎也關「張細倫」事,「今年我覺得係《反黑》加埋『盲俠』一齊,先會有咁嘅肯定,絕對唔可以忽略咗『張細倫』。」

期待同王祖藍合作

  不過,聽見浩信咁講,竟然搞到兩輯《踩過界》拍檔思貝呷醋,「佢同張振朗分別自從有《反黑》之後,嫌棄《踩過界》!」浩信即澄清,「又唔會!(這時背後揮春掉下)你睇講錯嘢啦!揮春都跌埋落嚟呀!」但思貝都承認是《反黑》粉絲,「集集都有拍手掌嘅位,但全部啲位都冇你份嘅!(王:哈哈!多謝你支持《反黑》!)」

  講到牛年願望,浩信一樣離不開《反黑》,「希望疫情快啲過去啦!可以再去到唔同地方,同唔同嘅觀眾多啲交流,試吓唔同嘅平台、電影、音樂啦!希望大家身體健康,希望發一個少少嘅願可以實現,希望2021年所有讀者朋友都會更加好,更加正面。我自己就繼續抱住我想做一個演員嘅心態,去繼續做好我嘅嘢。希望《反黑》有個延續,希望《反黑》同埋《踩過界》都有,不過《踩過界》有延續機會大過《反黑》,同埋今年都有套劇推出叫《刑偵日記》,其實對我嚟講都係一個里程碑,係個好難演嘅角色,一個多重人格角色,同紅姐(惠英紅)係一個好開心好開心合作,希望呢套都係畀觀眾留下印象嘅劇集。」

  至於4月才跟王祖藍開拍古裝新劇的思貝,就想趁空檔好好學習及吸收養份,「我會上吓普通話堂,唔可以咁兒戲去做訪問㗎啦!我o依家好似連彈琴都唔識彈咁,其實我考咗8級,唔可以嘥咗佢,呢段時間會睇多啲書同戲,有空檔可以更加任性煲通宵睇幾套戲,喺唔同範疇吸收多啲嘢。」而她亦好期待跟祖藍合作,「因為真係可以喺佢身上學好多嘢,佢啲急才轉數快各樣嘢,我都想睇吓佢點樣去寫個劇本出嚟,好多嘢可以學到,好似嗰陣時《大帥哥》拍張衛健一樣。」

撰文:杜淑霞 攝影:張詠森 髮型:Sue [email protected] festival walk(浩信)、@zaptang(思貝) 化妝:Henry Li(浩信)、@stephenmakeup(思貝) 服飾:SANDRO HOMME及Theory(浩信)、Max&Co.及DOLCE & GABBANA(思貝)

其他文章
hd