首頁 日報娛樂

同陳楨怡郭柏妍齊派利是感新奇 謝嘉怡冇時間拍拖事業行先

19/02/2021
■陳楨怡、謝嘉怡、郭柏妍期望喺牛年一炮而紅,大吉大利。
■陳楨怡、謝嘉怡、郭柏妍期望喺牛年一炮而紅,大吉大利。 (1/7)

  應屆香港小姐冠軍謝嘉怡(Lisa)、亞軍陳楨怡(Celina)、季軍郭柏妍(Rosita)喺大年初一返公司做新春節目。今年三人都初嚐派利是滋味,Lisa感覺好新奇,她哈哈大笑說:「o依家Celina同Rosita變咗係我個伴侶咁,一齊派同一個銀碼嘅利是畀人!」Lisa暫時以工作為重,暫時唔需要搵伴侶!採訪:方騫平 攝影:譚壹致

  大年初一,四位應屆港姐謝嘉怡、陳楨怡、郭柏妍及「友誼小姐」鄺美璇喺TVB新春節目中跟「財神」胡楓一同派利是,陳楨怡聽前輩講做藝人要派吓利是,所以亦受教,私下有派利是畀工作人員。謝嘉怡愈派愈開心,因為以往只係收利是,今年除咗感受到農曆新年熱鬧氣氛,好似多咗人生伴侶咁,成雙成對派利是畀人;郭柏妍唔覺得肉赤,因為年初一返公司未必見到好多熟悉嘅人。

  講到搵真命天子,除咗陳楨怡有男友外,Lisa同郭柏妍都話要專注事業先,Lisa說:「唔使咁快,我得25歲,咁細個唔使拍拖住,而且啱啱入娛樂圈,好想挑戰自己,o依家學緊廣東話。」記者讚佢可愛一定有人追,Lisa笑言,「Maybe,我唔知,都冇乜時間,有時間都同Celina、Rosita相聚啦,佢哋兩個重要過拍拖。」至於揀偶條件,她講明唔要靚仔:「我主要睇性格,太靚仔太自戀會好有問題,因為我唔係自戀狂,同呢啲人拍拖好麻煩。」而率先有機會拍劇,於新劇《白色強人II》同陳豪合作嘅郭柏妍就相當興奮,仲話獲陳豪提點,教佢點樣講對白會比較自然,o依家好鍾意做戲,對拍拖零興趣。陳楨怡表示同男友有共識,趁年輕將重點放喺工作上。

其他文章
hd