首頁 日報娛樂

牛年行運 首度剖白拒做大馬少奶奶原因 龔嘉欣唔使男人照顧

24/02/2021
繼續當旺
■龔嘉欣已獲委派主演4套新劇,牛年繼續旺。
繼續當旺 ■龔嘉欣已獲委派主演4套新劇,牛年繼續旺。(1/10)

  31歲的龔嘉欣在TVB台慶勇奪「馬來西亞最喜愛TVB女主角獎」及「最受歡迎電視女角色」,正式「升呢」TVB一線姐仔,嚟緊會主演4套劇集,好受重用,牛年絕對有運行。嘉欣終於上到位,背後付出好多,除咗拍到周身傷患外,去年更放棄做大馬少奶奶,她亦默認有呢件事,「我唔會為結婚而結婚,o依家我真係好開心!」採訪:方騫平

攝影:梁志明

  盛傳龔嘉欣去年有機會嫁畀錫到佢燶,送車送樓兼送火鍋店嘅「富二代」男友Bryan,更已擇好日子,只要女方應承就可以做大馬少奶奶。但因為龔嘉欣唔想長留當地,過住啲相夫教子,平淡「少奶奶」生活,最終放棄嫁入豪門,繼續留港在演藝事業上搏殺!

等緊體諒佢嘅人

  問到點解有少奶奶嘅福都唔去享,嘉欣默認:「我都31歲人,唔算係細個啦,如果考慮結婚,最重要係家庭同事業取得平衡,搵拍拖對象唔難,但要搵到一個人可以互相支持對方嘅工作唔容易,而且作為娛樂圈人,仲要顧及埋另一半嘅感受,更加唔係易事。」當姐仔個個都想嫁個有錢人,但她卻放棄可以「上岸」嘅對象,記者表示可惜,她即說:「我唔會為結婚而結婚,我第一份工係做演員,就算o依家出現另一半,都唔會為佢放棄艱苦經營咗13年嘅事業,而且我唔使男人照顧我,我靠努力去爭取o依家擁有嘅嘢,我覺得咁樣會好開心,所以o依家好開心,亦唔介意將來公一份,婆一份。」嘉欣強調目前等緊一個會體諒到佢嘅人,「o依家疊埋心水調養同賺錢,除咗要供樓,拍《大醬園》時因為太攰,搞到耳水不平衡要入院治療,當時好無助同忟憎,埋怨自己唔調理好身體。」

唔同蔡思貝比較

  龔嘉欣不敵蔡思貝失落「視后」,但因為劇集《殺手》及《香港愛情故事》贏盡口碑獲封「民選視后」,還有唔少網民替她不值。她開懷大笑,反問:「係咩?哈…咁樣我經已好滿足,其實都冇諗過嗰兩套劇會咁爆,做人要知足,對我嚟講係好大鼓勵,增加咗唔少自信心,相對會對自己要求更高。」對於蔡思貝奪視后備受爭議,她即避談:「我唔想比較,我冇諗點解唔係視后,其實都關乎觀眾口味,鍾意邊類劇種,我諗最重要係實至名歸。但我有咁嘅成績,我好開心。呢刻攞唔到視后唔緊要,可能係好事,證明我要更加努力。當然,都想盡快可以達到視后目標。」

其他文章
hd