首頁 日報娛樂

自爆性格不合撇老外男友 靠40吋逆天長腿吸桃花楊柳青

27/02/2021
■楊柳青變身旗袍美女,大晒40吋白滑長腿。
■楊柳青變身旗袍美女,大晒40吋白滑長腿。 (1/9)

  大年初三情人節,「Sexy女神」楊柳青(Wiyona)向本報自爆失戀,當天她親率「桃花團」成員鄧洢玲(阿旦)、《全民造星III》十強之一李靜蓮 (Alina)及林子超(Andy)到著名玄學家陳定幫佛堂祈福兼行桃花運。穿上高衩、短身旗袍嘅楊柳青及Alina鬥晒逆天白滑長腿,好搶Fo,而阿旦嘅E cup身形,玲瓏浮凸盡展曲線,索呀!楊柳青坦承:「女仔身形靚,就有條件揀個好對象啦!」 採訪:方騫平

  憑TVB劇集《解決師》彈出嘅楊柳青,32B Fit爆身材勁吸睛,火辣辣引到老外男友把持唔住,喺銅鑼灣街頭上演攬啜激嘴畫面!可惜熱戀過後,楊柳青以性格不合提出分手,結束兩年情。回復單身的她,今年更加需要桃花。

「人愈大愈唔識得拍拖」

  當天楊柳青閉目雙手合十,帶住「桃花團」成員繞着桃花順時針行咗3個圈,其間仲刻意用手肘觸碰到桃花枝嚟「攞彩」:「我年年都搵幫幫師傅,佢好準,會畀好多意見我哋,行咗幾年桃花運求人緣及觀眾緣,so far事業運都唔錯,但今年真心希望搵到一位高大威猛,有錢有內在,錫我、甚至愛埋我屋企人、朋友嘅真命天子。不過覺得自己人愈大,愈唔識得拍拖,尤其我同前度有文化差異,有啲問題磨合唔到,惟有同佢提出分手喇!但太傷心喇,失戀好似歷盡滄桑咁,詳情唔想多講。」陳定幫安慰她放心,今年她係會有桃花嘅,只不過行緊「寡宿」,代表想專注事業,未必咁想拍拖住啫。

李靜蓮邱士縉sweet爆

  做生意仔嘅阿旦反而落晒閘話唔要桃花:「難得政府放寬番食店及按摩店限制,梗係全力搏殺!」而Alina同MIRROR成員邱士縉(Stanley)拍拖拍得好鬼sweet,o依家努力賺錢就夠:「之前參加《全民造星III》用咗10幾萬,好彩o依家接咗好多job,漸漸搵得返,可能之後我同Manson(張進翹)會有啲合作plan。」至於林子超係楊柳青健身中心拍檔,他簽咗邵氏,拍緊新劇《十月初五的月光》,事業發展得唔錯,有埋桃花就最好。

  提到3人變身索爆旗袍美女,楊柳青坦言女仔身形好會加分:「因為做運動會操靚個身形,着衫自然靚,身形好,內在同自信心、成個人嘅氣場都會唔同咗,皮膚、氣色都好啲,條件好,自然有條件揀人啦!」

其他文章
hd