首頁 日報娛樂

拍檔踢爆「瞞孕」拍《五星II》 沈卓盈佗B開工 仆親激嬲老公

09/03/2021
■Jess在拍攝期間一直「瞞孕」,有次仲被地毯Kick到雙膝撞落地!
■Jess在拍攝期間一直「瞞孕」,有次仲被地毯Kick到雙膝撞落地!(1/11)

        沈卓盈(Jess)和鄺芷凡(Omi)及新加入的「女神經」梁諾妍(Inez)為香港開電視節目《五星級絲打II》擔任主持。後兩者唔覺意踢爆大肚Jess拍攝時着高踭鞋跑上跑落,仲試過被地毯Kick到雙膝撞落地,嚇到老公喝令佢唔准再出街!講到《五》節目超旺丁,上輯主持倪晨曦和Jess先後大肚,自言隨時「閃生」的Inez即被爆趁機睇酒席,仲睇到流晒口水!

36歲的沈卓盈與商人老公杜灝標結婚兩年,今年元旦宣佈造人成功!目前佗B約7個月的Jess早前瞞孕拍《五星級絲打II》,鄺芷凡和梁諾妍大爆:「佢唔想我哋Extra take care佢,驚麻煩到我哋,所以佢冇同我哋講,如果知道就會叫佢小心啲,佢成日着對好高嘅高踭鞋行嚟行去,早幾日膝頭哥仲撞咗落地,瘀晒,好危險!」問老公可有擔心?Jess嬌嗔:「佢聽到都嚇死,叫我唔好出街,邊度都唔好去,但俾地毯Kick親唔關我事㗎嘛,以後會加倍小心。」

大肚易攰

  提到介紹了不少酒店及美酒佳餚,大肚的Jess卻未能盡情享受,Inez笑言生冷及最高級的美食都由她「頂」,Omi補充:「佢食得嘅我哋都畀佢大快朵頤,平時拍嘢只係食兩啖,但今次佢食晒,食飽就瞓,令我哋都好懷疑佢大肚。」Jess坦言因妊娠反應,令她拍攝時好易攰、飆汗又嘔,搞到卡都冇力打,「嗰時好餓,但又諗唔到食乜,好糾結。」向來嗜甜的她更忽然抗拒甜品,轉食Pizza、薯條,令好友陳凱琳猜測今胎是B仔,Jess故作神秘:「我知BB性別,但想畀大家估吓,仔女都冇所謂,最緊要健康。」

隨時閃生

  對於《五》非常旺丁,問被批奉子成婚的Inez會否是下一個?她即射波:「Omi加油呀!(Omi:佢已經睇晒新房、婚宴場地,仲流晒口水,應該Ready喇!)冇呀!我年紀Ready囉,又唔驚大肚嘅。(期待?)有就嚟㗎喇,話唔定真係閃生。」Jess即笑稱要對親,那麼跟洪永城幾時結婚?Inez說:「冇特別計劃,我哋都順其自然、玩即興嘅,而家向住呢個方向進發。」

撰文、攝影:黎寶倫

化妝:Phoebe [email protected]

(沈卓盈)、Chris(梁諾妍)

髮型:Eas Fu @ AdmiX Hair Styling

(沈卓盈)、jackal @HAiR(梁諾妍)

服裝:tout a coup(梁諾妍)

場地提供:Mini Central

其他文章
hd