首頁 日報娛樂

教女沙灘片石捉蟹仔 郭富城化身Chok龍友影老婆

31/03/2021
■城城在囡囡面前Chok爆表演片石,吸引大寶企定定望到實,好得意!
■城城在囡囡面前Chok爆表演片石,吸引大寶企定定望到實,好得意!(1/11)

        



郭富城(城城)自拍畢內地電影《我的爸爸不一樣》後便一直留港陪家人,早前仲拖太太方媛(Moka)去銅鑼灣睇畫展,逗留兩個鐘就「掉低」7位數掃走7幅靚畫!未有工開的城城近日盡情享受天倫樂,日前Moka亦於微博晒一家四口春遊照。深明身教的重要性,城城陪住兩個寶貝女都刻意轉玩低消費活動。早前下午,《頭條日報》記者撞到郭氏一家喺淺水灣石灘捉蟹仔,其間城城Chok爆表演片石,仲耐心教3歲大女Chantelle片O添,之後又踎低幫老婆影靚相,一人服侍3個女人真

係忙!採訪:張詠森

        日前,「城嫂」於社交網分享出遊相,除了母女去水族館睇「Nemo」外,仲晒出「大寶」Chantelle和即將2歲的「二寶」Charlotte同爸爸一齊去捉蟹的溫馨照,而當日《頭條日報》記者也在場全程直擊。當日下午5時許,城城拖住大寶從停車場步行到淺水灣沙灘附近的石灘,而太太與工人姐姐就「的」住二寶緊隨其後,唔只兩個寶貝以「孖妹Look」,穿公仔白Tee襯牛仔褲、紮孖辮兼戴心心太陽眼鏡遮樣,郭氏夫婦也一身Sporty Look孭情侶LV袋。

影慣影熟

甫抵達石灘,工人姐姐先幫「小主子」摺起褲腳,Moka即刻低頭忙住搵蟹仔,而貪玩的城城就執了幾塊石仔,並於囡囡面前Chok爆表演片石,拎住個桶仔企喺旁邊的大寶睇到眼定定,城城見狀即彎腰揀塊靚石畀囡囡玩,點知耐心講解完一輪,大寶接過石仔即「捩」手丟落地,逗得城城哈哈大笑!隨後,天王城城又踎地陪女捉蟹,Moka在旁舉起手機影花絮;未幾眾人移師隔離沙灘繼續玩,兩公婆在夕陽下頭貼頭Selfie之餘,城城仲化身「龍友」踎地幫坐喺大石上的Moka低炒影靚相,見其手法純熟,估計都係被老婆訓練有素。玩足一小時,臨走前城城仲帶囡囡去食雪糕,用普通話問囡囡,「要不要吃冰淇淋?」,大女即大聲用奶音答,「要。」其間發現記者都主動打招呼,又問記者「要唔要食啲嘢飲啲嘢呀?」真係暖意又窩心呀!

見城城咁Nice,記者上前搲水吹,讚兩位囡囡好乖,城城答:「乖㗎。」問囡囡係咪成日困喺屋企好悶所以帶出嚟放電?城城好腼腆咁話:「成日都要㗎啦。」之後再問工作問題,佢話而家拍緊廣告,籌備緊拍電影,卡士就唔講住嘞,留心問答環節,城城邊答邊兩手捉住背囊帶又腳踢踢,好似小學生放學咁,勁得意。

其他文章
hd