首頁 日報娛樂

封中島美嘉做「女神」 Manson揀女友最緊要瘦

02/04/2021
■曾患抑鬱症的Manson,承認以往迫得自己太緊,寫《今天不想做嘢》就想提醒大家要懂得放鬆。
■曾患抑鬱症的Manson,承認以往迫得自己太緊,寫《今天不想做嘢》就想提醒大家要懂得放鬆。 (1/7)

  Manson(張進翹)參加完《全民造星III》後,最近推出首支新歌《今天我不想做嘢》。他認為參加《造星》就似上了一個人生精讀班,令他認清要行音樂創作路線,新歌由他親自創作,正好反映當時正準備參賽心情。自問不是「男神」的他,「女神」則是日本才女中島美嘉,連揀女友都受對方影響以瘦行先。

撰文:杜淑霞 攝影:譚壹致 化妝:@carmencmakeup_cc

場地:Comfort Soul 共享·舒釋

  對於參加《造星III》,Manson形容是上了個「人生精讀班」,「同咗好多唔同人合作,亦有唔同導師指導,又喺短期內有好密集表演機會,呢啲機會可能要儲好多年先得到,o依家就有機會畀你磨練,係一次千載難逢經歷,而且收集咗好多支持自己嘅人,同埋一班Manliens(粉絲專屬名稱)。」

想同二汶合作

  比賽後,Manson更加清楚要行創作歌手路,「我會keep住創作音樂,無論係busking或者Live騷,用音樂表演都想做,當然都希望拍到電影或者其他表演藝術嘅形式,但重心多啲喺音樂上面。希望年尾可以出到一隻EP,會有5、6首歌,自己創作之外,都期待同其他音樂人,譬如同(林)二汶老師合作。」講到在芸芸創作中揀了《今》做第一首派台歌,因代表了新階段開始,「我會形容喺農田清空完係一個新階段的自己,呢首係好直接誠實嘅作品,好想分享畀喺努力過程覺得攰嘅人。」原來創作源於電影,「由『鶯鶯燕燕翠翠紅紅融融洽洽』 呢句大家知係電影《唐伯虎點秋香》入面一句詩開始。」笑他抱住「對穿腸」心態去寫,他也認同,「係呀!哈哈!以前寫歌會覺得要寫啲好有意思嘅嘢,今次好似砌拼圖咁慢慢砌出嚟,由我好喜歡嘅電影對白開始出發。」

  談到被封「男神」,Manson就不敢當,但提到「女神」中島美嘉他即心心眼,「第一次畀佢觸動係聽《FIND THE WAY》,雖然嗰時聽唔到佢意思係乜嘢,但係喺佢聲線當中感受到佢嘅力量,好吸引同感動到我,之後開始留意佢嘅作品,跟住佢演戲,改變咗我好多嘅作品《NANA》。」他承認揀對象都要似「女神」,「我鍾意瘦嘅女仔都關中島美嘉事。」

其他文章
hd