首頁 日報娛樂

「懷疑」事件被恥笑無損心情 莊思敏食Tea現古怪雙下巴

09/04/2021
(1/4)

  上月才跟台灣老公楊秉逸隔空慶祝結婚一周年的莊思敏,因為4月1日在社交網貼出蝦碌Po:「永遠懷疑哥哥(張國榮)!」惹來全城嘲笑,仲被狠批唔識字兼對哥哥無禮。雖然連日被網民「懷疑」狙擊,但無損莊思敏心情,繼續靚相日日Po,趁住復活節長假又出街打卡。日前《頭條日報》記者於銅鑼灣撞到她與一名男友人單獨約會,傾多過食的莊思敏仲High到驚現激「凸」雙下巴,加上着鬆身裙兼踢住對平底鞋,係咪有咗?採訪:梁志明

  日前下午4時許,年過四十的莊思敏與男友人在利園三期的BELGOS歎比利時菜。貴為大馬拿督千金兼模特兒出身的她,當日以一身黑色連帽衞衣裙,襯一對懶佬布鞋當拖鞋踩踭着,加上一頭散亂頭髮,離遠睇十足隔離屋陳師奶落街買餸一樣,非常「街坊」!其間,即使餐點已經送上枱,但二人仍雞啄唔斷,繼續細聲講大聲笑,未知是否因與男士撐枱腳怕被人誤會呢?已為人妻的莊思敏全程提高警覺,不時環顧四周,非常緊張。

  隨後記者換個角度行近啲再影,化上淡妝、塊面脹卜卜的莊思敏幾乎冇乜點食嘢,不停手指指又擘大口狂笑,仲忘形地傾到雙下巴都凸晒出嚟,頓時令人想起電影《瘦身男女》中的「肥Sammi(鄭秀文)」造型!忽然發脹,唔通早前已被指肚凸凸的她真係「造人」成功?不過仔細再睇,從莊思敏大側面見到下巴肥肉上的「水餃仔」異常突出,相當得意!最後傾足超過一個鐘先埋單,男友人自己去攞車,莊思敏就獨自登上座駕離開。

其他文章
hd