首頁 日報娛樂

鼓勵Ian拍拖 冇諗過放棄保錡 花姐首爆《造星IV》構思鬥演技

16/04/2021
■花姐湊了MIRROR和ERROR兩年多,坦承仲學習緊點樣做經理人。
■花姐湊了MIRROR和ERROR兩年多,坦承仲學習緊點樣做經理人。(1/11)

        近期娛樂圈最火熱、日日都有新聞的藝人肯定是ViuTV《全民造星》出身的MIRROR和ERROR,16個囝囝有今時今日,節目監製兼經理人花姐(黃慧君)肯定是最大推手,《頭條》會一連多日同花姐細數「湊仔」苦與樂。首先講到他們出道以來最爆新聞之一,肯定是MIRROR的Ian(陳卓賢)和ERROR的保錡(吳保錡),爆完戀聞再爆是非,花姐承認有困擾,更有唔開心鬧過保錡,但從來冇諗過放棄。至於《造星III》成功,令TVB節目變陣,更誘發高層大執位,花姐竟然話好開心;花姐又透露正籌備《全民造星IV》,更構思加入更多戲劇元素,為戲劇界發掘更多新血。

撰文:杜淑霞 攝影:譚壹致

        湊了MIRROR和ERROR兩年多,花姐坦承仲學習緊點樣做經理人,但囝囝愈紅是非愈多,要拆彈唔易。她承認早前Ian和保錡,先後爆完戀聞爆是非,確實有困擾。講到Ian先跟陳曉華同車傳緋聞,再跟盧慧敏(Amy)爆戀情,花姐冇擔心過,「佢哋未拍拖前我都話Amy又靚又善解人意又開心,同你(Ian)好夾喎!佢拍咗一、兩個禮拜就同我講。我甚至唔知邊個係陳曉華,出咗新聞我冇嘢,因知一定唔係佢。」反而新城頒獎禮當晚Ian被影到跟Amy拍拖冇出席,被插掛住拍拖不工作令她有困擾,「覺得大家誤會咗Ian,Ian真係請假5點前去處理屋企事,冇錯嘅,同埋突然公開咗拍拖係咪好呢!?困擾半晚好快冇事,因Amy係個好positive嘅女仔,大家會支持,見到佢哋冧滋滋真係開心。」

  至於保錡爆出跟沙律(張沛樂)撻着後,被指未與賴嘉賢(Carrie)分手,更有多名女子自稱曾被保錡約上牀兼拍性愛影片,之後保錡開Live時不滿被指「呃蝦×」失控爆粗43次還擊,引起軒然大波,令花姐一度唔開心,「我嗰時有鬧佢,你係公眾人物係咪唔應該咁,喺個live度講粗言穢語,會有小朋友睇緊,嗰刻我係好唔開心,我同佢傾大家對你comment都唔好,我哋消化吓件事,你趁呢段時間作吓歌,佢都好願望去做,同我講『花姐你唔使唔好意思㗎!』」但她從冇想過放棄保錡,「心痛保錡有做錯事,但係應該原諒一個善良肯努力嘅人。」

開心觀眾追睇節目

  講到娘家TVB為《造星III》變陣,甚至綜藝換埋揸fit人,花姐話:「係咪有啲開心呢!?我開心唔係我贏咗你!真係冇,我好開心我嘅節目有人鍾意睇,最開心嗰吓,我啲朋友話要趕返去睇電視,呢個年代嘅人屋企部電視唔係開嚟睇電視,我聽見有朋友仲約埋朋友上去睇,我係為咗呢樣嘢興奮多啲,呢個係我志願嚟,希望我嘅節目大家會好似以前咁返屋企睇,呢樣嘢開心過隔離台要變陣,其實隔離台變唔變陣,對我冇影響,我都係咁樣做。」

  至於正在籌備的新一季《造星》,花姐話正在構思會加入更多戲劇元素,可能要參賽者互鬥演技,「《造星III》佢哋有實力但係冇機會,但係第4屆佢哋唔係冇機會,可能佢哋唔了解自己最好嘅一面而行錯咗路,譬如陳葦璇覺得自己係跳唱,從來冇諗過做戲,如果嚟緊嗰屆有陳葦璇類型嘅人,我會講畀佢聽你做戲可能好睇,可能《造星》個重點唔喺跳唱,可能發大少少喺綜藝或者戲劇,可以發掘到呢方面嘅星,呢個係我嚟緊呢一年諗法,但係點樣做我係未諗到嘅。(受《造星III 》影響?)係呀!梁祖堯同彭秀慧畀我影響好大,教咗我好多嘢。如果我可以搵到班做戲好叻嘅星喺《造星》出現都好,我接觸好多電影公司嘅人搵演員都斷層,我希望我可以搵到一班咁嘅人令到電影行業可以好啲。(導師?)我暫時冇諗法轉導師,我好希望係佢哋兩個,又好希望梁祖堯可以繼續幫我哋手,但佢哋各自有工作喺身要度吓,但我知道我出聲佢哋都會願意,我覺得佢哋會𦧲飯應,哈哈!」

其他文章
hd