首頁 日報娛樂

陪大肚新抱買BB嘢 家燕姐無上限任買預重用

20/04/2021
■家燕姐同兒子全程睇實Zoe,但Zoe佗得個樣好靚,行動好輕鬆,反而照顧返奶奶。
■家燕姐同兒子全程睇實Zoe,但Zoe佗得個樣好靚,行動好輕鬆,反而照顧返奶奶。 (1/6)

  下月榮升「家燕嫲嫲」嘅薛家燕心情愈嚟愈興奮,每天倒數迎接大日子,日日笑唔停。日前趁住復活節,難得兒子石耀庭(Jackson)及大女石祐珊都有假期,腹大便便嘅新抱仔陳素怡(Zoe)都破例出動,舉家去咗銅鑼灣shopping添置BB嘢,開心到爆嘅「家燕嫲嫲」講到出口想兒孫滿堂:「我無上限係咁畀錢,貴啲都冇所謂,可以重用嘛!」採訪:方騫平



  多年嚟薛家燕日日忙到癲,咁啱TVB綜藝節目大改革,可以放低做咗4年的《流行經典50年》重擔,真真正正享受吓人生,她開心說:「日前新抱仔帶我去銅鑼灣食Tea,我就陪佢睇BB嘢。我哋好似去咗泰國渡假咁,好享受!第一次同新抱仔行街,見佢個肚咁大,樣樣都睇住佢,不時叫佢坐吓休息吓,但佢步履輕鬆,反而會拖到我實,照顧返我。shopping期間,有唔少途人上前恭喜我,今年生日真係有好多驚喜。」

  當日,家燕姐同Jackson主力睇BB睡牀、Car seat、奶樽及消毒器等,家燕姐仲忍唔住嫲嫲上身,出手抱起個身穿藍白色間條A字裙嘅BB公仔,好有愛!問到係咪有寓意時?家燕解畫話:「其實男孫定女孫都冇所謂,我一樣咁歡喜。」問到家燕姐,有冇送上名貴大禮畀新抱仔鼓勵佢生多啲?她大笑說:「唔需要,佢乜都有,而且Zoe好精打細算,佢反而會從安全、穩陣、有質量嘅BB用品入手,總之佢鍾意買乜就買乜,我不設上限,反正可以重用,變相貴買平用。」疫情下家燕姐年幾冇見喺內地營商嘅男友A君:「今年生日佢有送花,禮物就堅持要面交,呢方面咁我都明嘅。其實佢好想下月返嚟見吓BB,但佢做生意咁忙,要隔離比較麻煩。」

其他文章
hd