首頁 日報娛樂

身家1.6億 「浩南Look」望海食茶記 直擊53歲鄭伊健 半退休生活

26/04/2021
健碩中佬
■53歲的伊健有胸肌,手臂起晒腱又冇肚腩,Keep得好好。
健碩中佬 ■53歲的伊健有胸肌,手臂起晒腱又冇肚腩,Keep得好好。(1/10)

          近年減產的鄭伊健主力靠走埠登台及開巡唱吸金,獲外界封為「隱世樓王」的他,除了市值約6,500萬港元、現居的淺水灣雅景閣1,600呎獨立屋外,還手持海外及黃埔花園、西貢村屋、匡湖居獨立屋等物業,保守估計身家約1.6億港元。早前,伊健仲打本百萬畀老婆蒙嘉慧(Yoyo)在福岡開設房地產公司,助港人於當地買樓及升學。踏入「收成期」的伊健深居簡出,平日留家打機居多,日前被《頭條日報》記者撞到單拖去屋企附近的茶記食Lunch,一身全黑「浩南Look」的他雖年屆五十有三,但手瓜、心口依然脹卜卜,好鬼精壯!採訪:張詠森

        去年底為撐新導演沈錫然,鄭伊健夥拍任賢齊及潘燦良等演出新片《大Project》,今年年頭又為金融集團拍廣告兼出新歌《STRONGER》。辛苦做完兩單Job後,伊健又回復「宅男」生活,長期留家跟太太蒙嘉慧打機過日辰,不過近日佢就為經理人林珊珊的網上頻道《大家好 ALL IS WELL》拍片,體驗做一日農夫,不時跟朋友落田耕種的他說:「為了身體健康,間中去郊外郁動吓拎吓鋤頭,總好過成日坐喺度。」難怪日前下午3時許,記者見到伊健由寓所步行至淺水灣沙灘附近的茶餐廳食Late lunch!估計Yoyo忙於打理地產生意,所以得佢一支公孤獨食,甫坐低,他即點了一份75蚊的燒鵝飯,明顯係熟客;其間他以手機撈飯,一邊食一邊低頭撳電話,睇睇吓又突然數晒手指又點晒頭,好似「幾千萬上落」咁計數計到翻晒眼,幾乎篤到飯都唔記得扒入口!

身材Fit爆

  大約食了半小時就畀錢走人,以「浩南Look」黑色V領短Tee襯黑褲、黑鞋、黑口罩的伊健,戴番副無框眼鏡,輕盈地從茶記門口彈落樓梯,並往鎮海樓公園方向前行打道回府,沿途睇到一望無際的大海景色,他仲好有閒情逸致地三度停低欣賞,見到街坊放狗都忍唔住露出笑眼,生活猶如半退休一樣,好寫意。雖然疫情下冇得Book場打羽毛球,但睇嚟伊健喺屋企都花好多時間健身,同埋真係經常落田耕種,睇佢手瓜起腱、 心口脹卜卜兼Pat Pat勁堅挺,身形拍得住小鮮肉,認真Fit到漏!

其他文章
hd