首頁 日報娛樂

拍《空肚講宵夜》擦出真友情 梁祖堯陳俞希蔡瀚億恨有現場觀眾

30/04/2021
■睇阿祖、Hailey和BabyJohn影相,就知三人幾有默契。
■睇阿祖、Hailey和BabyJohn影相,就知三人幾有默契。 (1/7)

  梁祖堯、陳俞希(Hailey)和蔡瀚億(BabyJohn)主持的ViuTV《空肚講宵夜》已經踏入第六季,三人合作一年半,由不太熟悉,到叫對方做「八婆」,大家互窒冇底線,他們都拍出火花及真友情。觀眾亦睇得相當投入,當了他們是好朋友,阿祖試過遇到女觀眾主動要求叫「八婆」;而他們最希望疫情完結有機會邀請現場觀眾一齊玩。 撰文:杜淑霞 攝影:譚壹致 服裝:Fred Perry(BabyJohn)、Duras Hong Kong(Hailey)

  原來未拍節目前,阿祖、Hailey和BabyJohn根本不熟,甚至互不相識,但來到現在觀眾都有同感,看到他們就似去了朋友屋企,邊煮嘢食邊吹水一樣,阿祖都承認覺得現在拍《空肚》愈來愈容易,因大家愈來愈熟愈有默契,「扮都扮唔到!」BabyJohn補充:「唔單止係扮唔到,唔係呢三個人撞埋一齊,就可以撞到呢個火花出嚟囉!呢個都係喺一年入面我哋建立嘅嘢,要好好珍惜嘅一件事嚟!」阿祖和Hailey都一同點頭。

  不但是三人由唔熟變熟,觀眾亦一樣,BabyJohn說:「以前行出街會話睇過你邊部戲,o依家全部都話我認得你《空肚講宵夜》嘛!有次爆咗胎,問車房可唔可以整,『你呀!駛入嚟啦!好耐冇睇到節目咁好笑!』嗰吓都幾窩心,仲話個個星期追。」阿祖說:「有條女無啦啦走過嚟『叫我八婆!』咁犯賤做人做到迫我嗌你八婆嘅!啲人好似好熟咁,搞到我都有啲尷尬嘅,佢哋睇個節目時候以為我哋識,但你唔記得咗,我哋真係唔識你㗎嘛!」

  既然三人拍得開心,觀眾亦睇得過癮,當然不希望節目停,展望未來他們就各有諗法。阿祖說:「有觀眾成日話想加到一個鐘,又話加到晚晚都有,我覺得唔得呀!晚晚都有,我會變咗450磅,咁樣食法真係搞唔掂!(加到一個鐘呢?)由佢吊住佢癮,佢覺得唔夠喉咪好囉!」Hailey說:「我就好希望請到現場觀眾,幾個嚟到現場睇吓,食吓嘢都好開心呀!希望疫情過後可以做到!當然飛去唔同國家梗係冇問題啦!(之前都試過國家主題)可以親身去到,真係要日日食㗎!(望阿祖)你OK嗎?」BabyJohn說:「去到外國就唔驚塞車㗎啦!(阿祖:都唔係㗎!曼谷都好塞㗎!)又關你事都唔係你揸!」Hailey說:「你都喺架車度瞓,到就叫你落車食嘢啦!」阿祖:「你哋咁恨出外地,我真係唔恨,如果我哋自己三個去旅行我就開心囉!出去拍嘢好辛苦!哈哈!都冇時間玩嘅!(係咪同阿Dee拍《老闆唔易做》之後怕咗?)拍嗰個之前都怕,冇咩撈佢搵我咪做囉!拍完都好玩嘅,但真係好辛苦!」Hailey說:「一係我哋照去拍,之後stay behind多幾日囉!」BabyJohn說:「佢會同你講『我哋不如去完個旅行我走先,你哋兩個自己拍啦!』哈哈!」

其他文章
hd